Shillong, Nailar 23: Saw ngut ki mynder na ka ri Bangladesh kiba thmu ban rung beaiñ shapoh u pud u sam jong ka ri India ki la shah kem ha ki shipai BSF Meghalaya ha ka sngi Palei.
Katkum u kyrwoh, la pyntip ba ki shipai BSF ki la ïohkem ïa ki saw ngut ki mynder kiba thmu ban rung beaiñ lyngba ka khappud jong ka East Jaiñtia Hills District.
Napdeng kiba la shah kem ki kynthup ïa ki lai ngut ki kynthei bad arngut ki nong India kiba pynrung tuh ïa kine ki mynder shapoh u pud u sam jong ka ri.
Da ka jingïakhun ban khanglad ïa ka jingrung beaiñ ha khappud bad ki kam khaii tuh ha shilynter jong ka khappud Indo-Bangladesh, ki shipai BSF Meghalaya ki la pynkhlaiñ bha ïa ka jingpahara bad ban khanglad ïa kine ki kam be-aiñ.
Ïa ki mynder Bangladeshi bad ïa kiba donkti ban pynrung tuh la aiti noh sha ki Pulit ban leh ïa kaba donkam katkum ki kyndon jong ka aiñ.
