Shillong, Jymmang, 17: Arngut ki briew ki la shah kem ha North Garo Hills District ha ka sngi Saitjaiñ halor ka jingkynnoh ba ki la ai jingkyrshan ïa ka Pakistan bad pyrta ruh ïa ki sur pyrshah India da ka Pakistan.
Ïa kine ki arngut la ithuh kyrteng kum u Silgring D. Sangma na ka shnong Chorebolbok bad u Asbath B. Marak jong ka shnong Chambildam, la ong ki Pulit.
Ïa ka case la register ha Bajengdoba Police Station hapoh ka Section 152/197(1)(d) jong ka BNS, 2023.
Ki arngut ki la shah kem halor ka jingshah ujor ba la mudui da ki bor synshar jong ka North Garo Hills ha ka 15 tarik mynta u bnai hadien ba kawei ka video na ka Facebook Account u Silgring D. Sangma Sangma ka la saphriang stet ha ka rynsan social media kum ha Facebook bad Whatsapp ha kaba kine ki arngut ki la pyrta shla bad pynphriang khubor da ka ktien Garo ïa ka jingisih niam bad pyrta sur pynrem ïa ka ri India.
Ka video ka long pyrshah ïa ka jinglong trai bad ka jinglong kawei jong ka ri India, khamtam haba peit ïa ka jingbym shongshngaiñ jong ka jinglong jingman ba mynta, la ong ki Pulit.
Ka jingtohkit halor kane ka case ka dang ïaid shakhmat, la pyntip ki Pulit.
