Shillong, Jymmang, 19: Ka puron ba pawnam ha ka ri Bangladesh ka Nusraat Faria kaba ak ruh ha kawei ka phlim kaba ïaid iew bha ha ka ri Bangladesh ka phlim Mujib ïa kaba ka la shim ïa ka bynta ban ak kum ka Sheikh Hasina mynta ka la shah set phatok bad la pynngat ïa ka ha ki kyndon thmu pynïap briew.
Ka dei ka phlim kaba la shna da u nong India u Shyam Benegal kaba pyni ïa ka jingim jong u Sheikh Mujibur Rehman bad ka khun jong u ka Sheikh Hasina.
La kem ïa ka na nongbah Dhaka katba ka dang thmu ban leit sha Thailand bad la pynngat ïa ka ha ka Case kaba naduh u Naitung 2024 kaba dei ka case kaba dang don ha Iingbishar bad ba ka jingtohkit ka dang ïaid mynta shakhmat.
Ha u Naitung 2024 uwei u briew uba la tip kyrteng kum u Enamul Haque uba ïa shim bynta ha ka jingïakhih u la shah siat na ki bynta jong ki kjat bad la pynkit ïa u sha Hospital namarba u don hapdeng ka jingbymtip briew shuh. Hadien ba u la koit na ka jingmynsaw, u la leit ujor ejahar ha ka 3 tarik mynta u bnai halor kane ka jingjia kaba la jia ha u snem baladep.
Ha ka case la pynmih kyrteng haduh 283 ngut ki briew ba kynthup ïa ka Myntri Rangbahduh barim ka Sheikh Hasina bad ki don ruh 17 ngut ki actor actress. Ka Faria ka la paw kyrteng lang ha ka thup kyrteng kaba 207 ngut bad la kynnoh ba ka dei kawei na ki nongbei pisa ïa ka seng Awami League, ka seng saiñpyrthei jong ka Sheikh Hasina.
Kiba bun ki briew ki la ong ba kane ka jingleh jong ka Sorkar jong u Mohammad Yunus ha kari Bangladesh ka dei ka bym ïahap eiei ha kaba la shu kem naphang ïa ki briew khlem da tohkit bnïah.
Bun ki riewshemphang ha ka ri Bangladesh kiba la ong ba kane ka dei ka kput jong ka Sorkar u Yunus ïa ki briew kiba kyrshan ïa ka Sheikh Hasina.
