Shillong, Naiwieng 08: Ka kynhun Pulit Anti Narcotics Task Force (ANTF) East Khasi Hills kaba la ioh jingtip kaba bniah mar mar ka la pynlong ia ka jingkhynra ha kawei ka ‘slum’ ha Sweeper Lane bad iohkem ia kawei ka kynthei kaba la 26 snem ka rta ha ka sngi balang.
Ha ka jingkhynra ia ka ing sah jong kane ka kynthei, ki Pulit ki la ioh ban kurup 92 tylli ki tyndong ba la thep ia u drok heroin uba khia 99.21 gram, 51 tylli ki tyndong ba thylli, 13 tylli ki synduk sabon ban thep ia u drok, kawei ka mobile phone, bad kawei ka Aadhar Card.
U Superintendent of Police, (City) ka East Khasi Hills, Bah Vivek Syiem ha u kyrwoh ba la phah sha ki lad pathai khubor u la iathuh ba kane ka nongkhaii drok ka dei kajuh ka briew kaba la paw ha ka video ha GS Road hajan Bimola kaba la saphriang ha ka rynsan Social Media bad kaba la pynsngewkhia haduh katta katta ia kiba bun balang ia ka jingdie pylleiñ pylleiñ ia u drok.
“Ka jingthwet ban iohkem ia kiwei pat kiba donkti ban die ia u drok ha kane jaka ka dang iai bteng. Ha kaba iadei bad kane, ia ka case la rejistar ha Shillong Sadar Police Station hapoh ki kyndon jong ka NDPS Act,” la iathuh u SP (City).
