Shillong, Jylliew, 24: Ki Pulit jong ka Anti-Narcotic Task Force (ANTF) ka East Jaiñtia Hills District ba la lamkhmat da u Deputy Superintendent of Police (Crime) u Bidhan Bhattacharjee ha ka Lah Sngi U Blei ki la ïoh kurup ïa u drok uba khia 164.99 gram na ki lai ngut ki snar khaïi drok.
Lai ngut kiba la shah kem ha Umtyra ki dei kiba la tip kyrteng kum u Sahin Hussain Laskar na ka shnong Nagdirgram, Cachar Assam, u Rofiqul Alom Laskar na ka shnong Harsinghpur Nagdirgram, Cachar Assam, ka Mamta Sinha na Simgiri, Chibitabicha, Cachar Assam bad ïa ka Maya Gwala ba la sin kyrteng kum ka Puchki kaba sah ha Pynthorbah Shillong, ki Pulit ki la kem na Khliehriat katba ka dang ap ban shimti ïa u drok ba la wanrah da kine ki lai ngut.
Ki Pulit ki ïathuh ba ka Maya Gwala ka dei ka snar khaïi drok kaba la shah kem teng ha u snem 2023 ha ki Pulit Khliehriat bad kiba la register case ïa ka hapoh ki kyndon 21(b)/29 NDPS Act 1985. Mynta ka kynti ka la shah kem biang ha ka sien kaba ar ha ki Pulit ka Khliehriat.
Kine ki lai ngut kiba rah ïa u drok ki la shong da kawei ka kali Hyundai Venue kaba don u nombar AS-01-EJ 8977 kaba wan na Silchar. Ki Pulit kiba la pynlong ka jingpynap ktem ki la ïoh bat ïa kane ka kali ha Umtyra bad ha ka jingkhynra ki la lap ïa u drok ba la thep ha ki khatsan tylli ki synduk sabon. Hadien ba la leh tes la pynshisha ba u dei u drok heroin.
Ha ka jingtohkit, ki lai ngut kiba la shah kem na Umtyra ki la phla ba ïa u drok ki la thmu ban aiti ha kawei ka briew kaba kyrteng ka Maya Gwala ba ju sin kyrteng kum ka Puchki kaba dang ap ha Khliehriat.
Ki Pulit ki la register case pyrshah ïa ki saw ngut ha Khliehriat Police Station bad ka jingtohkit ka dang ïaid shakhmat.
Ki Pulit ki la kurup noh ïa u drok, ïa ka kali bad ïa ki mobile phone na kine ki saw ngut.
