Shillong, Nailur, 21: Arngut ki runar ïa kiba la tip kyrteng kum u Max Eric Syiemlieh, 25 snem ka rta bad u Melvin Tongwah, 22 snem ka rta ki la shah kem ha ki Pulit jong ka East Khasi Hills District halor ka jingdonkti ban leh ïa ki kam pyntriem da kaba lute na ki ar tylli ki jaka.
Katkum u kyrwoh ba la phah da u Superintendent of Police u Bah S. Nongtnger ha ka sngi Saitjain, la pyntip ba ha ka 18 tarik, Nailur, 2024 ki Pulit ka Sadar Police Station ki la ïoh pdiang ïa kawei ka jingujor ejahar ha kaba ïadei bad ka jingshah lute kaba la jia ha ka 14 tarik u Nailur, 2024.
U nongujor u la pyntip hadien ba u la khang ïa ka dukan, u la shah khang kdong ha ki lai ngut ki briew kiba ñiah da ki Scooter hajan Little Blossom School. Kine ki lai ngut ki runar ki la sei da ki tiar pynmynsaw ryngkat ka byrngem byrsit hashwa ba uwei napdeng kine ki nonglute uba ñiah da ka thuk thuk ar shaka un sei da u nar rod na ka juti but. Kine ki nonglute ki la talasi ïa ka met jong u nongujor ki la ïoh khung ïa ka pisa kaba kot T.10,200 hajar kaba dei ka pisa kaba u nongujor u la ïoh na kaba die jingdie.
Ha kaba ïadei bad kane ka jingjia, ki Pulit ki la register case bad ha ka jingtohkit kaba bniah arngut ki briew kiba la suba ba ki dei kiba donkti ki la shah kem ha ka sngi Thohdieng mynta ka taiew.
U Superintendent of Police (SP) u la pyntip ruh ba kine ki arngut kiba la shah kem, kata u Max Eric Syiemlieh bad u Melvin Tongwah ki dei kiba pyrshang ban leit lute ha Hideway Cafe ha ka 16 tarik mynta u bnai ha kaba ki la shoh pynmynsaw ruh ïa uwei u briew.
Ka jingtohkit ïa kine ki arngut ka dang ïaid shakhmat ban lap ksai shuh shuh sa ïa kiwei pat ki nonglute kiba donkti ha kine ki kam runar.
