Shillong, Nailar 21: Lai ngut ki dkhot jong ka seng kieng atiar Hynñiewtrep National Liberation Council (HNLC) ki la shah kem ha ki Pulit jong ka Ribhoi District halor ka jingïasylla ban pynbthei bom ha ka sngi rakhe laitluid jong ka ri India kaba dang shu dep long shen.
Ki lai ngut ki dkhot ka HNLC kiba la shah kem ki dei kiba la tip kyrteng kum u Equest Langsiang, 31 snem bad u Deiborlangki Sariang, 31snem kiba sah ha Nartiang, West Jaiñtia Hills bad u Markhlan Biam 34 snem uba sah ha Laskeiñ, West Jaiñtia Hills
U Superintendent of Police ka Ri-Bhoi District u Jagpal Singh Dhanoa ha u kyrwoh ba la phah sha ki lad pathai khubor u la pyntip ba shwa ba ïohkem ïa kine ki lai ngut, ki Pulit ki la ïoh jingtip ba uwei u briew uba la tip kyrteng kum u Equest Langsiang, 31 snem ïa uba la suba ba u dei u dkhot jong ka HNLC u la sylla bad ki dkhot ka HNLC kiba rieh tngen ha ka ri Bangladesh bad kiwei pat ki dkhot bym lah ban tip kyrteng ki la thmu ban pynbthei ïa ki bom IED ha kiba bun ki bynta jong ka rilum Khasi bad Jaiñtia.
U SP u la pyntip ba ki Pulit ki la kem ïa u Equest Langsiang na lad Bethany Hospital, Nongpoh ha ka sngi Baar ha ka por kumba 12:30 mynstep bad lap ruh ïa ki sakhi sabut lyngba ka mobile phone jong u, ïa kaba ki Pulit ki la kurup noh. Halor kane, ki Pulit ki la register case ha ha Nongpoh Police Station hapoh ka Section U/s 113 (3) (5) BNS.
Ha ka jingtohkit, u Equest Langsiang u la phla ba u dei u dkhot jong ka HNLC bad donkti ban ïasylla ban buh ïa ki bom IED ryngkat bad ki dkhot jong ka HNLC da kaba phla ruh ïa ka kyrteng jong kiwei pat kiba donkti ha kane ka kam runar.
Ïa ki ar ngut la la kem na Jowai bad na Nartiang bad phla ruh ba ki dei ki dkhot jong ka seng HNLC bad ïa sylla ban pynbthei ïa ki bom IED ha ka 14 tarik bad 15 tarik Nailar, 2024 da ka jingbthah jong ki nongïalam ka HNLC na ka ri Bangladesh.
