Shillong, Nailar, 20: Hapdeng ka jingïakhih kaba dang bteng bad ka jinghiar arsut ka shongsuk shongssaiñ ha ka ri Bangladesh, lai ngut ki mynder na ka ri Bangladesh ki la shah kem ha ki shipai BSF na khappud ka West Jaiñtia Hills District ïa kiba la pynrung tuh da ki lai ngut ki trai jylla.
U kyrwoh ba la phah da u PRO jong ka tnat shipai BSF, Meghalaya Frontier u la pyntip, ba ha ka Lah Sngi u Blei ki shipai BSF kiba ap pahara ha khappud ki la ïoh kem lai ngut ki mynder na ka ri Bangladesh ha kaba arngut ki dei ki shynrang bad kawei ka khynnah kynthei lem bad lai ngut ki trai jylla nong India kiba donkti ban pynrung tuh ïa kine ki lai ngut sha pud u sam jong ka ri India.
Ki shipai BSF ki la pynkhlaiñ ïa ka jingpahara ha khappud jong ka ri India bad ka Bangladesh ban khanglad ïa ka jingrung beaiñ jong ki mynder na ka ri Bangladesh.
Ïa kine ki lai ngut ki mynder na ka ri Bangladesh bad ïa ki lai ngut kiba donkti ban pynrung tuh la aiti noh sha ki Pulit ba kin leh ïa kaba donkam katkum ki kyndon jong ka aiñ.
