Shillong, Naitung, 15: Ki Pulit jong ka East Jaintia Hills District ki la ioh kem sa ar ngut ki briew ia kiba la suba ba ki dei kiba donkti ban pyniap dusmon ia ki saw ngut ki briew ha kaba la lap ia ka met jong ki ha ka shnong Umpleng, East Jaiñtia Hills District ha ka step 6 tarik mynta u bnai.
Halor kane ka jingshah pyniap jong ki saw ngut ki briew, ki Pulit ki la register case hapoh ka Section 103/3 (5) jong ka BNS ha Khliehriat Police Station bad ka jingtohkit ka dang iaid shakhmat ban iohkem sa ia kiwei pat kiba donkti ha kane ka jingjia.
Ha ka 11 tarik mynta u bnai ki Pulit jong ka East Jaintia Hills District ki kem ia uwei u briew ba la suba ba u dei uba donkti ha ka jingshah pyniap jong ki saw ngut ki briew.
U SP u la iathuh ba ia ka kyrteng jong kiba la shah kem ym pat lah satia ban iathuh bniah namarba ka jingtohkit ka dang iaid shakhmat.
Kum ban shu pyntip hangne, napdeng ki saw ngut kiba la shah pyniap, lai ngut ki dei kiba la ithuh kyrteng kum u Ravi Rai, 23 snem ka rta na ka shnong Elam, Mechipradesh, Nepal, u Rajesh Rai, 26 snem na ka shnong Dharan Sunsari, Koshi Anchal, Nepal bad u Nasar Kyndait, 33 snem na ka shnong Dkhiah East Pohshnong, East Jaiñtia Hills District.
Katba ia uwei pat uba dang don haduh mynta ha ka jaka buh metiap ha Khliehriat Civil Hospital, ym pat don satia ban kam trai mano mano ruh.
