Shillong, Nailar, 10: Ki Pulit ka South West Khasi Hills District ha ka sngi U Blei ki la ïohkem sa uwei u mynder Bangladeshi ba la tip kyrteng kum u Mubarak Hussain, uba sah ha Kalagaon Sonamganj, Bangladesh ïa uba la suba ba u dei uba donkti lang bad ka kynhun Gang ki mynder Bangladeshi kiba la kieng atiar bha bad rung jubor beaiñ hapoh ka shnong Rongdongia kaba don ha khappud jong ka South West Khasi Hills District bad ka ri Bangladesh.
U Hussain, uba la shah kem ha ka shnong Gilagora da ka jingïarap jong ki paidbah, la ngeit ba u dei uba don kti lang ha ka kynhun Gang kaba don kumba 8-9 ngut kaba la rung beaiñ ban leh ïa ki kam pyntriem ha ka shnong Rongdangai ha miet shiteng synñia jong ka sngi Palei ka taiew baladep ha kaba ki la rahbor bad teh da u hetkheri ïa u Balsrang A. Marak, 21 snem ka rta da kaba thmu ruh ban pynïap ïa u da kaba shu sliah ïa u ryndang.
Ki paidbah nongshong shnong ryngkat bad ki bor shipai BSF bad Pulit kiba la kthong ïa ki runar Bangladeshi ha ka step sngi Saitjaiñ ki la ïoh kem ïa ki saw ngut katba ki dang rieh tngen ha khlaw.
U Superintendent of Police ka South West Khasi Hills Bah B. Jyrwa u la ïathuh ba une u mynder Bangladeshi uba san la ïohkem ha ka jingkhynra bad ka jingthwet kaba jur hapdeng ki Pulit ka District bad ki shipai BSF ha khlaw Chibak ha ka miet sngi Saitjaiñ.
Na kiba la shah kem ki Pulit ki la ïoh kurup ïa kawei ka Identity Card Pulit ka ri Bangladesh, ki slip thoh dawai, lai tylli ki Wireless Handset, uwei u sdie, kawei ka khanshi khap sainar, lai tylli ki tiar pynbthei barit, ka pisa jong ka ri Bangladesh bad ka pisa India.
Ka jingker sainar ha khappud ka dang ïaid shakhmat ban khanglad ïa ki kam runar ruser bad haduh mynta ki Pulit bad ki BSF ki dang pynlong ka jingthwet kaba jur ban lap shuh shuh sa ïa kiwei kiba donkti lang ha ka kynhun Gang.
