Shillong, K’lyngkot, 21: San ngut ki mynder Bangladeshi kiba dei ki snar khaïi tuh ki la shah kem ha ki shipai BSF bad ïoh kurup ruh ïa ki mar khaïi tuh ha khappud ka Indo-Bangladesh.
Kine ki san ngut ki la shah kem hynnin ka Lah Sngi u Blei.
Hadien ba la ïoh ïa ka jingtip kaba bniah na ki tnat syntiat ki shipai BSF jong ka 200 Battalion ki la pynlong ïa ka jingap ktem ha South Garo Hills ha kaba ki la ïohkem ïa kine ki san ngut ki snar nongkhaïi tuh kiba la tip kyrteng kum u Md. Sakibul Basir, 20 snem na ka shnong Aqua Morolpara, Mymensingh District, Bangladesh, u Adnan Mahamod Rohim, 22 snem ka rta na Mymensingh District, Bangladesh, u Sojib Ahamed, 17 snem ka rta na Mymensingh District, Bangladesh, u Md. Sakib Hussain 19 snem ka rta na Mymensingh District, Bangladesh bad u Md. Saju, 27 snem na Mymensingh District, Bangladesh.
Ha kawei pat ka jingkhynra ha khappud jong ka East Khasi Hills bad ka West Khasi Hills, ki shipai BSF ki la ïoh kurup bunbah ki mar khaïi tuh ba kynthup ïa ki masi, ka shini, ki nep syaid, u cumin Jeera, ka kiad bad kiwei kiwei ki mar kiba kot kumba T. 13.54 lak.
Ïa kine ki mar khaïi tuh la aiti noh sha ka ophis Customs bad sha ki Pulit ban leh katkum ka jingdonkam jong ka ain.
