Shillong, Jylliew, 23: Saw ngut ki nongkhaii drok ki la shah kem bad u drok na ki ar tylli ki jaka ha nongbah Shillong ha ka sngi Saitjaiñ
Ïa u Ram Singh 29snem bad u Vijay Singh 20 snem kiba sah ha Them Iewmawlong, la kem da ki Pulit ka Anti Narcotic Task Force (ANTF) East Khasi Hills ryngkat bad ki Pulit jong ka Mawlai Police Station na ISBT, Mawiong, la ong ki Pulit.
Na ka met jong kine ki arngut, ki Pulit ki la ïoh kurup 9 tylli ki synduk thep sabon ba la thep ïa u drok uba khia 110.32 gram, ar tylli ki mobile phone bad kawei ka Scooty Aprilia bym don ïa u Registration Number. Ïa kine ki mar, la kurup noh da ki Pulit.
Ha kawei pat ka jingkhynra, ki Pulit ki la ïohkem ïa kawei ka kynthei kaba la tip kyrteng kum ka Evanjrlyne Thongni na Lapalang, Lummarboh bad u John Robert Kharmyndai na Nongmynsong. Ïa kine ki arngut la kem na Demthring kaba hap hapoh ka Madanrting Police Station.
Na kine ki arngut ki Pulit ki la kurup ïa kawei ka synduk thep sabon ba la thep ïa u drok uba khia 11.43 gram, ar tylli ki mobile phone bad kawei ka Scooty (ML05-L-7620).
