Shillong, Nailar, 26: Hadien la ïoh ïa ka jingtip kaba bniah na ki tnat syntiat ba u don uwei u briew uba mih na Silchar, Assam ban wan sha Shillong ïa uba la suba ba u rah ïa ki jingdih pynbuaid ba la kheiñ beaiñ, ki Pulit ka kynhun Anti-Narcotics Task Force (ANTF), East Jaiñtia Hills District ha ka sngi Baar ki la pynlong ïa ka jingpynap shrip ha Umkiang police Patrol Post kaba hap hapoh u pud u sam jong ka Lumshnong Police Station .
Ha kane ka jingpynap shrip ki Pulit ki la ïoh bat ïa kawei ka kali ba la shong da u Hajrat Umar, 28 snem ka rta na ka shnong Kaliachak, Malda District, West Bengal bad ha ka jingtalasi ki Pulit ki la ïoh kurup 11 tylli ki synduk thep sabon ba la thep ïa u drok heroin uba khia 137.86 gram bad shongdor kumba T. 60 lak ha ka iew khaïi tuh bad 2 tylli ki mobile phone.
U kyrwoh ba la phah da u Superintendent of Police ka East Jaiñtia Hills u Vikash Kumar u la ïathuh, hadien kane ki Pulit ki la ïohkem sa ïa uwei u briew na nongbah Shillong uba donkti lang ha ka jingkhaïi tuh ïa u drok ïa uba la tip kyrteng kum u Phulchand Ali uba sah ha Lum Survey, Ajmera, Shillong.
U SP u la pyntip ba ki Pulit ki suba ruh ba kine ki arngut ki dei kiba donkti ha ka kynhun ki nongkhaïi drok kaba ju shalan ïa u drok na kawei ka jylla sha kawei ka jylla.
Ki Pulit ki la register ïa ka case ha Lumshnong Police Station hapoh ka NDPS Act bad ka jingtohit mynta ka dang ïaid shakhmat.
