Shillong, Jymmang, 20: Ki Pulit ka East Jaiñtia Hills District ha ka sngi Baar ki la kem ïa u nongñiah trok jong ka Star Cement Lumshnong ba la kynnoh ba u la iuh da ka trok ïa u nongñiah ka kali Pick-up uba la tip kum u samla Sniawbhalang Suchiang uba la ïap hashen.
U kyrwoh ba la phah da u Additional Superintendent of Police ka East Jaiñtia Hills u la pyntip ba ki Pulit ki la rejistar da ka criminal case pyrshah ïa u nongñiah trok ha Lumshnong Police Station ha kaba ïadei bad ka aksiden ba la jia ha ka 18 tarik mynta u bnai hapoh ka phyllaw jong ka Star Cement, ha kaba u nongñiah jong ka kali Pick-up u la ïap hashen bad kane ka jingjia ka la lam shaduh u pud ba ki paidbhur kin hiar thma.
Ha u kyrwoh u Additional SP um shym la pynpaw satia ïa ka kyrteng jong u nongñiah trok ka Star Cement.
“Ïa uba la shah kynnoh la kem bad la set ïa u ha Judicial Custody. Ïa ki jingdonkam la leh katkum ki kyndon jong ka aiñ,” la ïathuh u SP.
