Shillong, Nailur, 12: Uwei u rangbah ba la 47 snem ka rta ba la ithuh kyrteng kum u Bah Bajiedstar Kharsati, u la shah kem ha ki Pulit jong ka Mawryngkneng Police ha ka sngi Thohdieng ha kaba ïadei bad ka jingpynjulor ïa ki bynta jong ka ïingmane Presbyterian ha ka shnong Pomlahier, East Khasi Hills District.
Kane ka ïingmane ka la shah thang ruh ha ka 15 tarik Nailar, 2025, ha kaba ki shuki dieng bad ki shuki plastik bad ka bynta jong ka madan ba la siang da ka lyntang ki la julor.
Ki Pulit kiba la ïoh pdiang ïa ka jingujor ki la register case ha Mawryngkneng Police Station hapoh ka Section 326 (g) BNS.
Ha ka jingtohkit, ki Pulit ki la lap ba kane ka dei ka jingjia ha ka sien kaba ar ba ka ïingmane kan shah pynjulor ha kaba la suba ba la leh ïa kane ka kam da u Bah Kharsati ha kine ki ar tylli ki jingjia.
Hadien ka jingpynpait ïa ka jingkhangiit jong ka ïingmane ha ka 11 tarik, Nailur, 2025, u Bah Kharsati u la phet bak sha khlaw na ka jingsheptieng ïa ka jingshah thombor ha ki paidbah. Ki Pulit kiba la pynlong ka jingthwet ki la ïoh kem ïa u ha ka 12 tarik, Nailur, 2025.
Ïa u Bah Kharsati la rah sha Mawryngkneng Community Health Centre (CHC) ban leh ïa ka medical examination, la ïathuh u SP ka East Khasi Hills Bah Vivek Syiem.
“Namarba ka paw ba u don ïa ka jingshitom ha ka bor pyrkhat, la pynkynriah noh ïa u sha MIMHANS Hospital, Shillong na ka bynta ban ïoh jingsumar,” la pyntip u SP.
