Shillong, Lber, 18: Ki Pulit jong ka Mawdiangdiang Police Out Post ki la kem noh ïa uwei u runar uba la tip kyrteng kum u Olius Mukhim, 27 snem ka rta uba donkti ban leh beijot ïa kawei ka samla kaba la 22 snem ka rta kaba don jingthud ha ki dkhotmet.
Ka hymmen jong kane ka samla ha ka jingïakren bad u nonglum khubor ha Ganesh Das Hospital ha ka sngi Baar ka la ïathuh ba ka para ka la shah leh be-ijot naduh ar taiew mynshwa ha ka por ba ka la leit kai sha iing sah jong kawei ka paramarjan kaba sah ha Tynring Dongpdeng ha ka por 8:00 baje mynstep bad ïa kane ka jingjia ki bahaing hasem ki dang ïoh jingtip tad haduh ka 16 tarik mynta u bnai hadien ba ka la phla ïa kane ka jingjia ha kawei ka paramarjan namarba ka para kam shym la ïathuh satia ïa ka jingjia ha la ki bahaing hasem.
Tang shu tip ïa kane ka jingjia, ki bahaing hasem ki la ujor da ka ejahar sha ki Pulit jong ka Mawdiangdiang Police Out Post pyrshah ïa u nongleh kam bymman.
Haba ïakren bad ki lad pathai khubor u Superintendent of Police ka East Khasi Hills Bah Vivek Syiem u la pynthikna ïa kane ka jingjia bad ïathuh ruh ba ïa u nongleh kam bymman uba la tip kyrteng kum u Olius Mukhim, uba la 27 snem ki Pulit ki la ïohkem bad la tian bishar ruh ha Kashari.
Haba kylli, u SP u la ong ba ka don ka kyndon jong ka Person with Disabilities Act bad ka kyndon jong ka BNS kaba ïadei bad ka jingpynshitom ïa kiba thombor ïa ki briew kiba don jingthud ha ki dkhotmet.
U la pyntip ruh ba ki Pulit kin da la ïoh bor na ka Kashari kin sa pynlong shuh shuh ïa ki jingtohkit kiba bniah ïa u nongleh kam bymman.
