Shillong, Lber, 11: Ki Pulit jong ka Mairang Police Station ki la rah tohkit ïa ki saw ngut ki briew halor ka jingïap jong ka Kong Darisha Lyngdoh Kynshi bad i khun ba dang ar bnai bad napdeng kine ki saw ngut, ïa ki lai ngut la pyllait noh hadien ba ladep ban tohkit katba ïa uwei pat la kem noh.
Ïa kane la pynthikna da u Superintendent of Police ka Eastern West Khasi Hills u Bah D. Khyriem ha ka jingïakren bad u nonglum khubor ha ka sngi Baar.
Lah ban pynkynmaw hangne, ïa ka metïap jong ka Kong Darisha bad i khun ba dang ar bnai, ïa kaba la suba shah pynïap, la lap ha ka step jong ka 2 tarik, Lber 2025 na kawei ka pung pynlang um kaba jyndong kaba don ha ka shnong Langtor bad katkum ka jingïathuh jong ki bahaing hasem la ong ba ka Kong Darisha ka la jah na ing naduh ka 1 tarik, Lber 2025.
Ha kane ka sngi, ki paidbah ka shnong Langtor kynthup ruh ia ki dkhot ka Meghalaya Asha Workers Union (MAWU) bad ki khynnah skul ki la iaid paidbah ban pynrem halor ka jingshah pyniap ka kong Darisha bad i khun ba dang ar bnai bad dawa ruh ia ki bor jong ka aiñ ban ai ia ka jingbishar kaba hok bad ban pynshitom mardor ia kiba donkti ha kane ka kam bymman.
