Shillong, Naiwieng, 16: Ka District Magistrate jong ka East Khasi Hills District ka Kong Rosetta Mary Kurbah ha ka 13 tarik u Naiwieng, 2023 ka la pyntreikam ia ka iktiar ba la pynkupbor hapoh ka Section 144 Criminal Procedure Code ka la mana ban pyndonkam ia ki Horn kiba pynmih ia ka jingsawa kaba jam shaba palat, ban die paidbah ia ki tiar jingrwai kiba khlem lah ban tehlakam ia ka jingpynsawa, ban pynpah Horn ha ki jaka ba la pynbna kum ki Silence Zones (kata ym duna ia ka 100 mitar na ka jingdon jong ki Hospital, ki jaka pule, ki iingkashari, ki jaka mane Blei), ban pynpah horn ha ka por mynmiet hapdeng ka por 11 baje mynmiet haduh 6 baje mynstep ha ki jaka sah briew hynrei lait noh haba don kino kino ki khep ba kyrkieh, ban pynpah ia ki Air Horn da ki kali kit ñiut hapoh ka Section 179 (1), 190 (2) bad 194F jong ka Motor Vehicle (Amendment) Act, 2019.
Katkum kane ka hukum, ka District Magistrate ka la bthah ia ki dukan bad ia ki Workshop kiba die ia ki Duplicate ne ki Replica Exhaust Pipes kim dei shuh ban dang die nangne shakhmat hynrei lym kumta kin ngat ha ka jingshah daiñ kuna hapoh ka Motor Vehicles Act bad kiwei kiwei de ki ain.
Ka District Magistrate ka la mana ruh ba ki paidbah kiba pynkhein ia kane ka hukum kin shah pynsajia hapoh ka Section 188 jong ka Indian Penal Code. Shuh shuh ka District Magistrate ka la pyntip ba ka jingpyntreikam ia kane ka hukum ka long hadien ba ka Sorkar Meghalaya lyngba ka Transport Department ka la pynmih ia ka jingpyntip ha ka 4 tarik, Nailar 2023 kaba khang ban pyndonkam ia ki Horn kiba pah huleng, kaba pyndait ia ki silencer kiba sawa bad kiwei kiwei ki tiar kali palat ia kaba la ai jingbit hapoh ka Rule 119 (2) bad Rule 120 (2) jong ka Central Motor Vehicles Rules 1989 bad ka Section 52 jong ka Central Motor Vehicles (CMV) Act khnang ban tehlakam da ka ain bad ban pynduna ia ka jingpynpah Horn jong ki kali bad ki thuk thuk kiba ktah ia ka koit ka khia jong ki birew bad ki paidbah nongshong shnong.
Namarba kane ka kam ka long kaba kyrkieh, ka District Magistrate ka la pyntip ruh ba kane ka hukum kan treikam noh mardor tad haduh ban da pynbna da kumwei pat.
