Shillong, Nailur, 18: U Myntri barim ka Sorkar Jylla u Rakkam A. Sangma uba long ruh u MLA jong ka NPP u la shah pakhang lynti ha ki nongïakhih ha Jorabad ha ka sngi Palei, kat haduh ba u la hap ban pan jingïarap na ki Pulit ka Jylla Assam ban ïoh bteng ïa ka jingïaid lynti ban leit sha Garo Hills.
Bun ngut ki nongjngohkai pyrthei bad ki nongleit jingleit ki la mad jingeh hadien ba ki nongïakhih ha ka jylla Assam ki la phah hiar lut ïa ki briew na ki kali ha khyrdop ban rung sha ka jylla Assam, kat haduh ba ka la pynthud ïa ka leit ka wan jong ki briew bad ki kali.
Da ki phew spah ngut ki nongpyrshah na ka jylla Assam ki la pyrta ïa ki sur jingdawa ba u Rakkam u dei ban leit phai biang sha Meghalaya, katba ki nongïakhih ki dang dawa ïa ka kali kaba kit ïa u ban phai dien biang. U nongïalam ka NPP u la pynphriang ruh ïa ki video katba ki nongpyrshah ki dang khang lynti bad u la pyntip ba u la shu lait da ka jingïarap jong ki Pulit.
Kane ka la jia katba ka jingïakhih jong ka All Khasi Meghalaya Tourist Taxi Association (AKMTTA) ka dang ïaid shakhmat, kaba la dawa ba dei ban khang ïa ki kali kamai Tourist na ka jylla Assam ban rung sha ki jaka jngohkai pyrthei kiba don ha ka jylla Meghalaya, ka la nang pynheh shuh shuh ïa ka jingïakynad.
U Rakkam u la kyntu ban long kiba jaijai bad ban pynlong da ka jingïakren hapdeng ki ar liang mamla khnang ban wad ïa ka rai kaba lah wanrah ïa ka jingïasngewthuh jingmut bad ban kiar na kaba pyndik ïa ki paidbah na ki ar tylli ki jylla.
Ha kajuh ka por, ka Sorkar Jylla ka la bthah ïa ka AKMTTA ban ïakren bad ka high-level committee ba la khlieh da u Chief Secretary, khlem da shimkhia wat hadien ba la mih ka jingïakynad.
