Shillong, Jylliew, 01: Haduh 37 tylli ki ing ki la shah pynjulor ha ka jinglynshop jong ki bor mariang na ka jingther jong u lapbah lapsan ha ka jylla Meghalaya baroh kawei uba la neh haduh saw sngi kynthih, kata naduh ka 29 tarik, Jymmang haduh ka 1 tarik Jylliew.
Katkum ka jingai jingkheiñ jong ka Meghalaya State Disaster Management Authority (MSDMA) ha ka sngi u Blei, la pyntip ba kam shym la don shuh kano kano ka jingjia hynrei lait noh tang ka jingtwa khyndew ha ka shnong Umskun bad Umjari-Umtrai, kiba hap hapoh ka Umling C&RD Block, Ribhoi District.
Ka MSDMA ka la pyntip ba haduh 1221 ngut ki briew ha ki 10 tylli ki district ka jylla ki la shah ktah ha ka jinglynshop ka mariang na ka jingther jong u lapbah lapsan. Kine ki kynthup ïa ka East Khasi Hills, Eastern West Khasi Hills, Ri-bhoi, West Jaiñtia HIlls, East Jaiñtia Hills, South West Khasi Hill, West Khasi Hills, West Garo Hills, South Garo Hills bad South West Garo Hils.
Ki shnong kiba la shah ktah ha kine ki saw sngi ba la leit noh ki long haduh 86 tylli kiba hap hapoh ki 23 tylli ki C&RD Block kiba don ha ki district bapher bapher ka jylla. Ki jingtei kiba la shah pynjulor ki long 45 tylli.
Ka jingther jong u lapbah ka la dkhat jubor ruh ïa ka jingim jong ki 6 ngut ki briew bad 4 ngut ki la mynsaw jur.
Ki bor synshar ki la ki la sam ruh ïa ki marbam sha ki lanot ha Dehal Bagan bad ha Upper Bangan kiba hap hapoh ka C&RD Block, Ribhoi District ha ka sngi U Blei.
