Shillong, Nailar 05: Kawei ka long kmie kaba sah ha MLA Hostel, Shillong ka la phah ïa ka jingujor ba ha ka 2 tarik mynta u bnai ha ka por 8.30 baje mynmiet, ki runar bym lah ban ithuh ki la ktah kti ïa ka bad ïa u khun jong ka bad kumjuh ruh ïa ki 2 ngut ki paralok hajan lad YMCA, Shillong.
Ha ka janmiet 3 tarik mynta u bnai ki runar bym lah ban ithuh ki la ktah kti ïa 2 ngut ki briew kiba kyrteng u Arginius Shangpliang ba la 24 snem ka rta bad Shaipharlang Syiemlieh ba la 25 snem ka rta ha Ïewduh, Shillong. Ha kane ka jingjia ki lanot ki la mynsaw malu mala bad la pynkit noh sha CH Shillong ban ïoh ki lad jingsumar.
U Bah Ferdinand Mynthlu u la ujor ha ki Pulit ban pyntip ba ha ka janmiet jong ka 3 tarik mnyta u bnai, ki runar bym lah ban ithuh ki la prong hapoh ka ïing jong u kaba ha Pohkseh, Shillong bad ki la tuh ïa ka iPad kaba shongdor kumba T. 10,000/-.
U Shakeel Ahmed u la ujor ha ki Pulit ban pyntip ba ha ka 2 tarik mynta u bnai, uwei u briew bym lah ban ithuh u la knieh ïa ka pla jong u kaba don ka pisa kumba T. 1 lak, katba u dang ïaid na Ïewduh sha Jhalupara, Shillong.
Ha kawei pat ka jingjia u Robiclesansman Lyngdoh Kynshi u la ujor ba ha ka miet 31 tarik, Naitung, ki runar bym lah ban ithuh ki la tuh ïa u battery ba shongdor T. 14,000/- na ka JCB na Pyndengumiong Dong Langstiehrim, Eastern West Khasi Hills District.
Ki Pulit ki la pyntip ba ka la don ka jingujor ba ha ka 2 tarik mynta u bnai ha ka por 11.20 baje nohphai sngi bad katba ki dang pynlong ïa ka jingtalasi, ki la ïoh bat ïa kawei ka MTC Bus kaba don u nombar ML-03-0238 ha Umkiang, East Jaiñtia Hills bad ki la lap ïa ki synduk ba don u suba drok 23.24 grams na ki 2 ngut kiba shong ha kane ka kali ba kyrteng u Reobenezer Pyngrope, 27 snem bad u Bankyrman Jyrwa, 22 snem ka rta.
Kawei ka longkmie ka la ujor sha ki Pulit ba ha ka 22 tarik, Jymmang uwei u briew uba kyrteng u Tynjuhbor L Nonglait, u la kyrpad ïa ka ban thied ïa ka kali Bolero pick-up lyngba ka kyrteng jong ka, da kaba kular ban siew T. 2 lak kum ka Down Payment. U Bah Tynjuhbor L Nonglait u la ong ba un pyndonkam ïa kane ka kali da kaba siew manla u bnai ha kaba kane kan ïarap ïa ka ban siew ïa ka EMI. Hynrei haduh kine ki sngi um shym la siew satia ïa ka pisa manla u bnai kumba ladep ïakut.
U Mahanando Hajong na ka shnong Rangatari, South West Garo Hills District u la phah ka jingujor sha ki Pulit ban pyntip ba ha ka 3 tarik mynta u bnai u Chondon Barman u la ktah kti ïa ka para jong u kaba dang 18 snem ka rta. Ha kane ka jingjia, ka samla ka la mynsaw bad la pynkitnoh sha PHC Garobadha bad hadien la pynkit noh sha Civil Hospital, Tura.
