Shillong, Rymphang 18: Tang hadien shi sngi ba la pynsaphriang ïa ka Voice recoding ha ki lad pathai khubor da uwei u rangbah ha ka rynsan ïalap election kaba la long ha ka Lah Sngi u Blei mynta ka taiew ha ka shnong Liarsluid ba hap hapoh ka Umroi Constituency, u Syiem ka Hima Mylliem u Paiem Ainam Manik Syiem mynta ka sngi u la ujor da ka ejehar sha ki Pulit ka Lumdiengjri Police Station ba ka jingpynsaphriang ïa ka Voice Recording ka la ktah ïa ka long ryngieng jong u kum u Syiem ka Hima mylliem.
Kum ban pynkynmaw, ha ka rynsan ïalap election na ka bynta ki kyrtong ïakhun MDC ha Umroi la pynlong ha ka 17 tarik u Rymphang 2025 ha ka shnong Liarsluid, bad uwei na u rangbah na ka shnong Nongrim Nongladaw u la pynsaphriang pynban ïa ka Voice recording, kaba u syiem u ïa kren bad uwei na u bahaing hasem ban shim kabu pynban ha katei ka rynsan ïalap election MDC.
Ha ka ejejar, u Paiem Ainam Manik Syiem, u la pynpaw ba katei ka jingïakren ha ka mobile phone ka dei kaba ki ïa kren ïa ki kam kiba ym lah ban pynpaw pyrthei, hynrei utei u rangbah u la shim kabu pynban ban pynsaphraing wat sha ki lad pathai khubor.
U Paiem Ainam u la pynpaw ruh ba kane ka jingleh une u rangbah ban pynsaphirang ïa katei ka Voice recoding ka la ktah shisha ym tang ïa ka long ryngieng ka man rynieng kum u Syiem ha ka jingïadei bad ki paidbah bad kane ka la ktah ruh ïa ka jingmut jingpyrkhat jong u.
Ha ka ejahar kaba u la ujor sha Lumdiengjri Police Station, u Paiem Ainam Manik Syiem u la kyrpad ïa ka bor ka aiñ ba kin leh da kaba tyngeh pyrshah ïa utei u rangbah uba la pynjah burom ïa u bad ha kajuh ka por ruh u la kypad ba dei ban shimkhia bad ban pyngngat katkum ki kyndon jong ka aiñ.
