Shillong, K’lyngkot, 27: Ka Hynñiewtrep Border Disputed Redressal Forum ba la lamkhmat da u Chairman u Bah Chandame Sungoh bad u Bah Thmulangki Sayoo ha ka Lah Sngi u Blei ka la aiti da ka jingthoh ha u Deputy Commissioner jong ka West Jaiñtia Hills District u Bah B.S Sohliya da ka jingkyrpad ban pynneh ia ka shongsuk shongsaiñ ha ki shnong kiba hap ha ka thain Block -1.
Ka Forum ka pynpaw ba ha elekshon ba ladep ki ju don ki jingshah maham bad ki jingpyntieng pynsmiej bad ka jingshah pyndik ha ka leit ka wan jong ki Khasi Pnar kiba shong basah ha kane ka thaiñ da ki kynhun jong kawei pat ka jaitbynriew.
Kumta ka Forum ka kyrpad ïa u Deputy Commissioner ba un shimkhia ban ïakren bad u Deputy Commissioner jong ka West Karbi Anglong District ban pynneh pynsah ïa ka shongsuk shongsain khnang ba kan ym don shuh ka jingpyntieng pynsmiej bad ka jingshah pynthud jingpynwit ha ka leit ka wan jong ki Khasi Pnar ha ka jingpynlong ïa ka election MDC sha ka Jaiñtia Hills Autonomous District Council.
