Nongstoiñ, K’lyngkot, 29: Ki kmie ki kpa bad ki bahaïing hasem jong ka samla Lilyioris Wahlang, 21 snem ka rta ba la suba ba ka la shah pynïap dusmon ha ki runar ha ka 20 tarik mynta u bnai ki la dawa ia ka aiñ ban pynioh ia ka jingbishar kaba hok bad ba ki runar kiba donkti ki dei ban ngat ha ka jingpynshitom katkum bashong ka aiñ.
Kum ban pyntip hangne, ha ka 20 tarik mynta u bnai la lap ïa ka metiap jong ka samla Lilyioris na ki bynta ka Wahriat marjan bad ka jaka ba thmu pynlong jaka ot doh bad kane ka la pynlong ïa ki kmie ki kpa ryngkat ki bahaïing ban suba jur ba ka dei ka jingshah pynïap dusmon hadien ba ki la ïohi ïa ki dak mong na ka jingshah dung da ki kynja tiar banep ha ka met jong kane ka samla.
Ka Kong Wentina Wahlang, kaba dei ka kmie jong ka lanot haba ïakren bad ki lad pathai khubor ka la ïathuh ba ha 20 tarik mynta u bnai ka la mih na la ïing ha ka por 7:00 baje mynstep khlem wan phai ïing shuh.
Kumta u kpa ha ka jinglyngngoh, namarba ka dei ka khun ka bym ju kham mih na la ïing bad ka bym ju pyndonkam mobile phone u la leit wad kylleng ki jaka baroh shi sngi da kaba ai jingpyntip sha ki Pulit bad ha ka por 4:30 eiei janmiet la lap pynban ïa ka metiap jong ka lanot kaba la thiah lyngktar hajan Wahriat.
Ki Pulit ruh ki la register case halor kane ka jingjia katkum ki kyndon jong ka aiñ.
Naduh ba la lap ïa ka metïap jong ka lanot, la palat shitaïew na ka liang jong ki bahaïing hasem kim pat ïoh jingtip ei ei mano ba leh ia kane ka kam runar bad kane ka la pynrit mynsiem ïa ki bahaïing ha kaba ki la kyntu jur ïa ki nongmihkhmat, ki sengbhalang khamtam ki bor ka aiñ ba kin ïarap lem ban pynïoh ïa ka hok jong ka samla Lilyioris Wahlang.
