Shillong, Rymphang, 28: Kawei ka longkmie kaba la tip kyrteng kum ka Kong Damonica Laloo, 41 snem ka rta ka la shah pynïap ha uwei u para ïatreilang ha Trattoria Restaurant, Central Ward Barik Lachumiere, Shillong.
Halor kane ka jingjia, ki Pulit ki la kem ïa uwei u briew ba la suba donkti ïa uba la tip kyrteng kum u Sunai Singh, 42 snem ka rta.
U Kyrwoh ba la pyntip da u Superintendent of Police ka East Khasi Hills Bah Vivek Syiem ha ka sngi Thohdieng u la ïathuh ba ka kynhun ki Pulit na Sadar Police Station ka la ïoh jingtip halor kane ka jingjia ha ka por 10:20 baje mynstep na u trai jong ka Trattoria Restaurant, Central Ward Barik Lachumiere, u Bah Batskhem Suting ba kawei ka nongtrei kynthei jong u, la suba ba ka la shah pynïap ha ka bynta ba shapoh jong ka Restaurant.
Ka kynhun ki Pulit na Sadar Police Station ki la leit marmar sha kane ka jaka ban pynlong ïa ka jingtohkit. Ha kajuh ka por ka kynhun jong ka FSL bad Crime Scene Unit ki leit sha kane ka jaka bad ban pynlong ïa ka jingtohkit kaba bniah ban lum ïa ki sakhi sabut.
U SP u la pyntip ba ka Kong Damonica Laloo ka dei kaba shong basah ha ka shnong Lawsohtun bad ka trei kum ka Cleaner jong ka Trattoria Restaurant.
Katkum ki sakhi sabut ba la ïohlum da ka jingïarap jong ka kynhun FSL bad Crime Scene Unit, ka kynhun tohkit jong ki Pulit ki la lap ksai ba dei u Sunai Singh uba trei lang hapoh ka kane ka Restaurant uba donkti ban dkhat jubor ïa ka jingim jong ka Kong Damonica.
Shuh shuh u SP u la ïathuh ba ha ka jingtohkit, u Sunai Singh u la phla ha ki Pulit ba u la leh ïa kane ka kam bymman bad u la phla shuh shuh ba kane ka jingjia ka la lam shaduh u pud ba un dkhat jubor ïa ka jingim jong ka Kong Damonica ka dei namar ka jingïania kaba jur kaba la jia ha ka 27tarik, Rymphang, 2025 ha ka por kumba 11:00 baje mynmiet hadien ba u la buiad khawyiang bad kaba la jia na ka jingïadon jingïadei hapdeng kine ki arngut.
U SP u la pyntip ba u Sunai Singh hadien ba ladep pynïap u la buhrieh ïa ka met jong ka Kong Damonica hajan u Transformer jong ka KJP Assembly Conference Centre.
Hadien ka jingtohkit, ki Pulit ki la kurup noh ïa ki tiar bad ïa u pipe ba la pyndonkam ban pynïap ïa ka Kong Damonica.
Ka jingtohkit halor kane ka jingjia ka dang ïaid shuh shuh shakhmat ban lap ksai shuh shuh lada dang don mano mano kiba donkti ha kane ka kam bymman.
Ki Pulit mynta ki la register case ha Sadar Police Station bad ïa u nongleh kam bymman la kem noh da ki Pulit bad shen yn sa tian bishar ïa u hakhmat ka Kashari.
Hadien ba la pyndep ïa ka jingtohkit, ïa ka met jong ka Kong Damonica la pynkit noh sha NEIGRIHMS Hospital ban leh ïa ka post mortem ha ka sngi Saitjaiñ.
