Shillong, Nailur, 18: Ka la mih ka huri hura kaba jur ha ka thaiñ Jorabad ha ka step Sngi Palei hadien ba ki nongñiah kali kamai Tourist na Assam ki la khanglad ïa ki kali kamai bad wat ki kali shimet na ka jylla Meghalaya ban rung sha Assam.
Kane ka la jia katba dang ïaid shakhmat ka jingïakhih jong ka All Khasi Meghalaya Tourist Taxi Association (AKMTTA) kaba la sdang naduh ka 16 tarik mynta u bnai kaba dawa ia ka Sorkar Jylla ban khang noh ia ka jingrung ki kali kamai Tourist kiba nabar jylla sha ki jaka jngohkai pyrthei kiba don ha Meghalaya.
Ka jingshah khang ki kali na Meghalaya ka la wanrah ruh ia ka jingdheng kali kaba jur bad bun ki paidbah ki la sahkut bun kynta namar ka jingbym lait lynti na ka jingshah pakhang bad ia ki nongleit jingleit la phah hiar noh tang ha Jorabad.
Da ki spah ngut ki nongñiah kali ki la mih sha surok ha khrum ka jingkieng ha Jorabad ban khanglad ïa ki kali na Meghalaya ban rung sha Assam wat u Myntri barim ka jylla Meghalaya u Rakkam A. Sangma u la ngat lang ha ka jingshah pakhang bad u la lait noh da ka jingtuklar jong ki Pulit.
Na ka jingïakhih jong ka AKMTTA, ki nongleit nongwan kiba thmu ban leit sha ki jaka sumar, ki kad liengsuin bad ki railway station kim ïoh shuh ban rung sha Assam bad lada ki kwah ban bteng ia ka jingleit jong ki, ki hap ban shim bujli da ki kali na Assam.
Lah ruh ban kdew hangne ba ka AKMTTA ka dawa ban khang ïa ki kali Tourist nabar ka jylla ban rung sha ki jaka jngoh kai pyrthei bad ban ailad lem ïa ki trai muluk ban shim ïa katei ka bynta ban pynpoi sha ki jaka jngohkai pyrthei ban kamai namar ka jingjynjar bad ka jingduh kamai jong ki ka la buh jingeh, hynrei ka jingïakhih jong ki kam dei satia ban khanglut ïa ki kali Assam ban rung sha ka jylla, katba ki nongñiah kali na Assam ki la shim kabu ban pynthud lut ïa ka leit ka wan jong ki paidbah kaba la pynbitar ïa ki nongleit nongwan namar kane ka jingleh jong ki kam dei satia ka lynti ban khanglut ïa ki paidbah namar ka dei tang ka kam kaba dei ban pynbeit hapdeng jong ki ym ban ktah ïa ki paidbah.
Hadien ka jingshah ktah kaba jur na ka jingshah pynphai ki kali ka jylla Meghalaya, ki bor Pulit bad Majistor ki la hiar sha Jorabad ban tem ïa ka jinghuri hura bad ban ïakren sngewthuh ba kam dei satia ka lynti ban wanrah jingsuk hynrei ka dei pynban ka jingai ding ban pynbitar ruh wat ïa ki nongleit nongwan kiba beh la ki jong ki kam ki jam.
Tang shu poi ha Jorabad, u Majistor na Ribhoi u Bah A Myrthong u la ïoh ban ïakren bad ki nongïalam ka kynhun ban pynsngewthuh ïa ki bad kular ruh ban shimkhia ïa kane ka kam bad ban pynbeit mardor, namar kane ka jingiakhih bad ka jingkhanglad ïa ki paidbah ban leit sha Assam kan ktah lut ïa ki paidbah.
Ka kynhun ki nongñiah kali kamai na Assam ki la pynphai ñia ruh ba kane ka kam kam dei satia ma ki kiba sdang hynrei dei tang AMKTTA katba kiwei kiwei kim don jingthud eiei, ha kaba ki la dawa kem ruh ïa kiba pynthud nyngkong ïa ki kali Assam bad ba dei ban weng mardor ïa ka jingiakhih ban khanglad ïa ki kali Assam ban rung sha ki jaka jngohkai pyrthei ha Meghalaya lym kumta kin nym weng satia ïa ka jingïakhih.
