Shillong, Naitung, 09: U Sub-Inspector (SI) bad saw ngut ki Pulit Langrut Unarmed Branch (UB) ka Sohra Police Station ki la shah sospon ha ka sngi Balang hadien ka jingujor halor ka jingkynnoh shah pynshitom beiñ u samla uba dang 19 snem ha thanat.
“Haba jubab mardor halor ka jingujor, la bthah ïa u Bah B. Wanswett, Sub-Divisional Police Officer (SDPO), Pynursla ba un pynlong ïa ka jingtohkit halor kane ka kam bad ban aiti ïa ka jingshem jong u. Da kaba pynshong nongrim ha ka kaiphod tohkit ba la aiti ha ka 09-07-2025, uwei u Sub-Inspector bad saw ngut ki Pulit Lanrut UB la sospon mardor. La sdang ruh ïa ki Departmental Proceedings pyrshah ïa ki,” la pyntip u Superintendent of Police (SP) ka East Khasi Hills u Bah Vivek Syiem ha u kyrwoh.
“Nalor kata, la register da ka criminal case pyrshah ïa kine ki Pulit hapoh ka Sohra PS Case No. 10/2025 U/S 120(1)/3(5) BNS, bad ïa ka jingtohkit yn sa khlieh da u Pulit ha ka kyrdan Inspector na kawei pat ka Police Station khnang ban pynthikna ba kan ym don ka jingleh shiliang,” u la bynra.
Katkum ka jingong jong u SP, u samla Getwin Jyrwa na Mawkisyiem u la shah kem ha ka 3 tarik, Naitung, 2025, ha kaba ïadei bad ka case jingshah thombor, ka jingpyndonkam ïa ki ktien khlemakor bad ka jingpynpaw pyrthei khlem akor. La ujor ujahar pyrshah ïa u ha ka 1 tarik, Naitung.
Hadien ba u samla Jyrwa u la shah kem, ka kmie jong u, ka kong Mildred Jyrwa ka la mudui da ka ejahar hakhmat u SP bad ha ka Meghalaya Human Rights Commission (MHRC) da kaba kynnoh ba u khun jong ka u la mynsaw ha ka met ha ka por ba u shah set ha Sohra Police Station, ïa kaba ka la suba ba la leh da ki Pulit.
Ka ejahar ba la mudui ha ka 1 tarik Jylliew ka la kynnoh ba ha ka 28 tarik Ïaiong, 2025, u samla Getwin Jyrwa u la thombor ïa uwei u briew ha Mawap, Mawkisyiem, da kaba pyndonkam ïa ki ktien sih bad kren bein, bad pynmih ïa ki jingbyrngem ïa utei u briew bad ïa ka jait jong u.
Shuh shuh, ha khmat ki paidbah paidlang, la kynnoh ba u la pynpaw pyrthei ïa ki bynta ba kyrpang jong u bad u la byrngem pathar, kaba la wanrah ïa ka jingsngewlehraiñ bad jingsheptieng ïa ki paidbah. Watla u la shah khot hajir arsien ha ka Dorbar Shnong Mawkisyiem hynrei u samla Jyrwa um shym la leit mih satia.
Katkum ka ejahar, la register case hapoh ka Sections 131/133/296(a) jong ka Bharatiya Nyaya Sanhita (BNS) pyrshah ïa u.
Ha ka 2 tarik, Jylliew, 2025, ha ka por 9 baje mynmiet la ïoh jingtip ba u nongshah kynnoh u don hapoh iing. Ki Pulit na Sohra PS ki la leit kem ïa u, hynrei u la lait phet shwa ban poi ki Pulit ha iing.
Ha ka 3 tarik Naitung, 2025 ha ka por kumba 11:00 baje mynstep, ka kmie jong u ka kong Mildred Jyrwa ka la leit ïalam ïa u sha Sohra Police Station. La pyntip ïa ka ba yn sa pyllait noh ïa u haduh ka por janmiet. Ïa une u nongshah kynnoh la phah eksamin sha Sohra CHC bad la ïalam biang ïa u sha thanad.
Hadien kata, ha ka por kumba 8:15 baje mynmiet ka kmie jong u ka la wan mih sha Police station bad la pyllait jamin noh ïa u.
Ka Kong Mildred Jyrwa ha ka ejahar kaba la mudui ha ka 7 tarik, Naitung, ka la kynnoh ba u khun jong ka u la mynsaw ha ka met ha ka por ba u don ha Sohra Police Station.
Ka la pynpaw, hadien ba ka la leit shimti ïa u, ka la ïalam ïa u ban leh eksamin sha Sohra CHC hynrei la phah noh sha Shillong Civil Hospital. Ka la suba ba ki jingmynsaw ki dei kiba la leh da ki Pulit.
Ha kajuh ka por, u SP u la ong ba ki Pulit ka jylla ki thrang ban pynneh ïa ka aiñbad ban pynthikna ïa ka jingkitkhlieh hapoh ki kynhun jong ki. Yn leh da kaba tyngeh pyrshah ïa kino kino ki briew lada lap ba ki leh bakla ne pyndonkam bakla ïa ka bor, u la maham.
