Shillong, Nailur, 10: Tang hapoh arphew saw kynta ba ka video ka la saphriang ha social media halor kawei ka jingjia ha Laban Police Station ba la kynnoh ba uwei u Sub Inspector ïa uba la tip kyrteng kum u Bah R. Marweiñ u la shoh khawiang katba u dang don ha ka kamram, ka tnat Pulit jong ka East Khasi Hills District lyngba u Sector Police Officer ka Laban ka la pynlong ïa ka jingtohkit ban lap ïa ka jingshisha.
Katkum ka video ba la saphriang ha ka social media, kawei ka kynthei ba la synran lang da ki katto katne ki briew ki la leit ban ujor ejahar ha Laban Police Station ha ka Lah Sngi u Blei halor ka jingshah ktah kti ha uwei u nongñiah taksi, hynrei ki la lap pynban ba une u Pulit Ophisar ula buaid kiad.
Ka tnat Pulit, ha u kyrwoh ka la pyntip ba ha ka miet Lah Sngi U Blei, la pyntip ba kawei ka kynthei ka la shah ktah kti ha uwei u nongñiah taksi ha Laban Police Station. La pynpaw ïa ka jingsngewkhia halor ka jinglong jong u Ophisar uba don ha ka kamram ha ka por mynmiet, ba la kynnoh ba u la buaid khawiang, kaba la lam sha ka jingïania.
Ka Women Police Station ka la ïarap ïa ka lanot bad register ruh ïa ka case katkum ka ejaharba la mudui da kane ka kynthei kaba la shah ktah kti.
Ka tnat Pulit ka la kyntu ïa ki paidbah ba kin pyntip ïa kum kine ki jingjia ne pan jingïarap lyngba u nombar 112.
U Superintendent of Police jong ka East Khasi Hills u Bah S. Nongtnger ha ka jingïakren bad ki lad pathai khubor ha ka Sngi Baar u la ïathuh ba ïa u Sub Inspector R. Marweiñ la ai jingpynshitom da kaba sonpon na ka kam bad ka jingtohkit halor kane ka la ïaid shakhmat.
Shuh shuh u la ong ba ka tnat Pulit kan ym aili satia ïa kino kino ki Pulit kiba tam pud bad kino kino kiba leh bakla bad ïa kino kino ki kam ki bym dei.
