Shillong, Naitung, 01: Ka jingther jong u lapbah uba la neh la kumba katto katne sngi ka la wanrah ïa ka jingtwa khyndew kaba shyrkhei ha ka step Lah Sngi u Blei hapoh ka shnong Umlieh, West Khasi Hills District.
Katkum ka jingïathuh u Sordar Shnong u Bah E.B Marngar, la ong ba ka jingtwa jong ka khyndew ka la jia ha ka por kumba 6.30 baje mynstep.
Ha kane ka jingtwa jong ka khyndew, kawei ka ïing dewbilat ka la shah tap ha ka khyndew bad ka surok Umlieh-Mawlangsu ka la shah khang lynti bad sahkut ka leit ka wan bad kumjuh kawei ka kali maruti Van ruh ka la shah tap ha ka khyndew hynrei donbok ba ym shym la don mano mano ba mynsaw namarba ha kane ka por ki briew kim pat don satia hapoh jong katei ka ïing ne ha ka kali.
Kane ka iing ka dei jong u Bah Onisha Wahlang bad ka kong Miansidaris Lyngkhoi, katba ka kali ka dei ka jong u Bah Derik Nongphud na ka shnong Umlieh.
