Shillong, Ïaïong, 07: Ha ka sngi U Blei mynta ka taïew ha ka por kumba 7:30 baje mynstep ki lai tylli ki ïing shong rep lyngkha kiba don ha Law Ksaw kaba hap hapoh u pud u sam jong ka shnong Nongkyllang-Mawpayier, Rambrai Syiemship, West Khasi Hills District, ki la shah thang dusmon ha ka kynhun kaba la kynnoh ba la ïalam da u Kimfa S Marbaniang MLA barim ka Rambrai Jyrngam bad u Paul Leong uba dei u kpa jong u Bah Kimfa.
Ki trai jong kine ki ïing kiba la shah thang kiba kynthup ïa ka Andria Mawnai, Noberstar Mawnai, Rajiv Mawnai, Plor Mawnai, Ebania Mawnai bad Langier Mawnai mynta ka Lah Sngi U Blei ki la ujor da ka ejahar ha Nongstoiñ Police Station pyrshah ïa ka kynhun jong u Bah Kimfa bad u kpa jong u da kaba la kynnoh ba ka kynhun ka la thmu ban pynïap ïa ki.
Ha ka jingīakren bad ki lad pathai khubor hadien ba la dep ujor ejahar na ka liang jong ka kong Pyier Mawnai bad ka kong Plor Mawnai ki la ong ba ka kynhun jong u Bah Kimfa bad u kpa jong u k lla shu wan byrngem byrsit ïa ki bad phah mih na ka jaka ba ki sah bad ki la kynnoh ruh ba u kpa jong u Bah Kimfa u la sei ruh da ka pistol bad thew na ka khlieh jong u Bah Rajiv Mawnai bad siat pyntieng ruh ar kuli sha suiñ.
Shuh shuh ki la ong ruh ba ha katei ka por ki ïadon baroh tang 6 ngut bad da ka jingtieng ki la ïa phet krad īalade ban lait na ka jingīap bad dei ha kane ka por ba ka kynhun u Bah Kimfa bad u kpa ki la thang syndon ïa ka ïing ryngkat ki jingdon jingem kynthup ïa ka pisa hynrei ki la ong pat ba donbok ha kane ka jingjia ym shym la don ba mynsaw.
Haba kylli halor ka daw kaba la pynmih īa kane ka jingjia na ka liang jong ki nongujor ki la kam ba ka dei halor ka jingïaknieh ïa ka khyndew da kaba ki la kynnoh ruh ba u Bah Kimfa bad u kpa jong u ki la shu wan ban kam jubor ïa ka jaka.
Kine ki lanot ki la kyrpad ruh ïa ki bor jong ka aiñ ba ki dei ban pynshitom da kaba tyngeh ïa u Bah Kimfa īa u Paul Leong bad ka kynhun jong ki.
