Shillong, Nailur 18: Ki jingïakynad ki la mih ha East Garo Hills hadien ba ki nongshong shnong kiba la shah ktah ki la kynnoh ïa ka National Highways & Infrastructure Development Corporation Ltd (NHIDCL) ba ka la pynjulor da ka bor ïa ki jaka ki riew shimet bad kumjuh ruh ki jingdon jingem ha shilynter ka surok Dainadubi-Darugiri kaba hap hapoh ka jingpyntrei jong ka National Highway-217 khlem da ïoh ka jingmynjur kaba dei. Ka Pubalim Momin, ka trai jaka na Gabil Bisa, Rongmil, ka la ujor da ka FIR ha ka 16 tarik mynta u bnai ha Rongmil Police Station. Ka la kynnoh ïa ki kontraktor ka NHIDCL ba ki prong beaiñ hapoh ka jingdon jingem jong ka ha ka meit jong ka 24 tarik u Nailar bad ki la pynjulor ïa ki dieng bad kiwei ki jingdon jingem jong ka.
Ka la ïathuh ba ka khlem soi ne mynjur haba ïadei bad ka jingshim jaka. Ka la kynnoh ruh ba ka bailutksan ba la tyrwa ka long kaba ym ïahab katkum ka dor kaba dei hok na ka bynta ka jaka jong ka. “Ki la kyntait ban pdiang ïa kane ka bai lutksan kaba bym dei hok hynrei ki la pyrshang ban byrngem ïa ngi ba ngi dei ban aiti ïa ka khyndew ka jong ngi, ki wan ha ka por mynmiet bad ki la pynjulor ïa ki jingdon jingem jong ngi,” ong katei kaba ujor ha ka FIR jong ka.
Ha ka FIR la ïathuh ba ki nongshong shnong ki la ïoh ruh ka lad ban shondur kiba long ruh kum ki sakhi ban ithuh ïa kine ki riew runar. Na ka liang ki nongshong shnong ki la kheiñ ïa kane ka jingjia kum ka jingprong jubor kaba beaiñ ban pynbor ïa ki, ban aiti ïa ki jaka jong ki.
Kane ka jingjia ka la mih hadien ba ka tnat Revenue ka la pynmih ka jingpynbna ha ka 26 tarik u Nailar mynta u snem. Kane ka jingpynbna ka khot na ka bynta ban pynlong ïa ka jingbishar kam haba ïadei bad ki jingpynshisha ïa ka khyndew ka shyiap na ka bynta kito kiba pyrshah kiba hab hapoh ka NH-217 widening project.
Ka jingpynbna ka la bthah ïa ki trai jaka na Rogu Alda shaduh Darugre Songma ba kin shim bynta ha kane ka jingpynshisha ïa ki jaka naduh ka 3 tarik mynta u bnai. Kine ki jingkynnoh ki la pynpaw ruh ïa ki jingartatien halor ka jingkhuid haba ïadei bad ka bai lutksan bad ka jingpyntreikam jong ki bor ba dei khmih. Ha kawei ka liang tang khyndiat ngut ki briew ha Rongjeng Bazar bad ki jaka ba marjan ki la don ha ka thup haba ïadei bad kane ka jingpynithuh ïa ki jaka. Kiba bun na ki kyrteng ki khlem shah kynthup ïa ka thup kyrteng ba la pynshisha da ka ophis Deputy Commissioner.
Kane ka kam pynlutksan ka la neh sah kum kawei ka kam kaba don ha ka jingartatien naduh u bnai Rymphang mynta u snem. Ki nongshong shnong ha ka sien kaba nyngkong ki la sngewthuh ïa ka pisa kaba la tyrwa ha kane ka por. Kiba bun ki la pynpaw ka jingpyrshah ïa ka dor bad kumta ki khlem soi ïa ka shithi jingmynjur ha ophis Deputy Commissioner ha East Garo Hills haba ki la shah khot ban pdiang ïa kane ka bai lutksan. Katto katne ki la soi ïa ki kot ki sla ba mynjur bad ki la pdiang ïa ka jingsiew pisa.
Khambun na ki, la ïathuh ba ki la pyndep ïa kane ka kam kyrkieh namar ki shah pynbor ne ba ki tieng ïa ki pulit bad mad ïa ki jingeh haba ïadei bad ka aiñ. Katto katne na kine ki trai jaka ki la pyrkhat ban pynphai noh ïa kane ka bailutksan bad ban ïaid noh da ka lynti jong ka aiñ. Ki la kynnoh ba ki jingsiew ki la long ha ka dor kaba rit haba nujor na ka dor kaba dei shisha na ka bynta ki jaka jong ki. Kane ka jingbym ïa mynjur ka la neh mynta lah da ki bnai. Ki nongshong shnong ki la ong ba kane ka song pisa bai lutksan ka long kaba ym pat biang.
Ki briew kiba la shah ktah kham ha shwa ki la aiti ïa ka jingkyrpad lang sha ka ophis Deputy Commissioner, East Garo Hills, haba ki la pynpaw ïa ka bailut ksan kaba duna kaba ki la hap ban duhnoh ïa ki jaka jong ki longshwa manshwa, nangta ki dieng kiba pynmih ki soh, bad ki tyllong um jong ki shnong. Ki nongshong shnong kiba la shah ktah ki la aiti ruh ïa ka jingkyrpad kaba thymmai ha ka 14 tarik u Naitung sha u Deputy Commissioner. Mynta ki dang ïasyllok bad ki nongsaid aiñ bad pyrkhat ba kin leit ujor ïa kane sha ka High Court lada donkam.
Ki ophisar na ka ophis Deputy Commissioner, East Garo Hills, kiba dei ka bor ban khmih halor kane ka jingshim jaka, ki khlem pat pynmih ïa kano kano ka jingkynthoh halor ka FIR bad ki jingkynnoh ba la pynpaw da ki nongshong shnong.
