Mairang, Lber 23: U Director jong ka College Development Council, NEHU Prof. D.R.L Nonglait ha ka sngi Thohdieng jong ka taïew baladep u la buh mawnongrim ban tei ïa ka jaka ai jinghikai ïa ki samla pule ka Khadsawphra College na ka bynta ka sobjek Vocational Training Course kaba ki Kolej ha kine ki sngi ki dei ban don na bynta ban ai jinghikai ïa ki samla pule katkum ka National Education Policy (NEP).
U Principal jong ka Khadsawphra College Dr. Boldness Lyngdoh Nongum u la ïathuh ba ïa mynta ka kolej ka don saw tylli ki Vocational Traning Course subject na bynta ki samla pule jong ka. Kane ka Training Centre ba la buh mawnongrim ha kane ka sngi ka long ban ai jinghikai ïa ki samla pule ha kaba ïadei bad ki kam misteri dieng (carpentry). Ka jinglut na bynta kane ka projek ka long kumba T. 1.25 klur kaba kynthup ïa ka building, ki mashin, ka bording bad ka jingtan um.
U Prof. Nonglait haba kren kum u kongsan u la ban bniah ïa ka jingdonkam jong ki VTC Course khamtam ka Carpentry kaba ki khynnah kin ïoh ban ieng ha la ki jong ki kjat ynda ki la pyndep ïa ka Training Course kaba ki hap ban pule ha ki lai tylli ki Semester.
U la ai ka jingïaroh ïa ka Khadsawphra College kaba la lah ban kynjoh sha u mawjam ban ai jinghikai ïa ki samla pule ha kane ka liang ha kaba u sngewthuh ba ka rukom pynkhreh ka College ïa kane ka bynta kan long katkum kane ka juk teknoloji.
U kyntu ruh ïa ki bor pynïaid jong ka college ba kan sdang noh ïa ki Post Graduate courses khamtam ki Professional Course ha ki snem ban sa wan namar kum ka college ka la biang ban leh ïa kata.
La ai jingkren ruh da u Vice Principal Babu Bakerphang War uba la batai bniah shaphang ki VTC Course jong kane ka College ba nalor ka Carpentry, ka Vocal, Khasi Traditional Music, ka Desktop Publishing, yn sa plie sa kiwei pat ki Course kum ka Tourism, Fisheries, Fashion Designing bad kiwei kiwei namarba ka kolej ka la don lypa ïa ki Infrastructure na ka bynta kitei ki sobjek.
Kiwei pat kiba la ai jingkren ha ki long u Sordar ka Shnong Mission Mairang Bah Beltestar Rani uba la long kum u Symbud Kongsan bad u President jong ka College Bah Lawanpynshngain War.
La pynbyrngia ïa kane ka sngi da ki jingrwai na ki samla pule jong ka Kolej.
