Shillong, Jymmang 08: Kum ka sienjam jong ka jingsdang ki kam technology halor ki kam sumar ïa kiba pang, ka DAE-Civil Hospital Cancer Wing, Shillong, ka la sdang ïa ka jingpule bniah kaba long lyngba ka VR-Assisted Guided Imagery Therapy (VR-AGIT) ha ka sngi Palei.
Hapoh ka jingïalam jong ka State Cancer Society of Meghalaya da ka jingïatreilang bad ka Ojaska Labs LLP bad ba la kyrshan da ka SMRATA Trust, kane ka jingsdang ka long halor ki lad sumar da kaba pyndonkam ïa ki Virtual Reality (VR) halor ka jingpang bampong bad kumjuh ruh ki nongpang kiba hap ban pyndep ïa ka chemo-radiation.
Ha kane ka sngi ka la don ruh ka jingsoi soskular ne ka Memorandum of Understanding (MoU) kaba long kum ka dak ka jingïatreilang hapdeng ka tnat Health and Family Welfare, ka sorkar Meghalaya, ka Ojaska Labs LLP, bad ka SMRATA Trust.
Kane ka jingïatreilang ka long ruh ka jingpyrshang ban buh ïa ki VR-Assisted Guided Imagery na ka bynta kiba pang bampong ha Meghalaya, kaba dei ruh ka sienjam kaba thymmai haba ïadei bad ka digital therapeutic na ka bynta ka oncology care.
Haba batai halor ki jingthmu jong ka project, u Principal Secretary in-charge ka Health and Family Welfare u Dr Sampath Kumar u la pynpaw ïa ka jingkyrmen bad ki jingïohi jngai jong ka kam pule VR-Assisted Guided Imagery Study, da kaba ban jur ruh halor ka jingpynkylla bathymmai haba ïadei bad kam sumar ïa kiba pang bampong.
Ïa ki jingtip ba bniah la ai da Dr. Sarat Addanki, Chairman ka SMRATA bad OJASKA Labs, ba la ïathuh halor ki rukom pyntreikam ïa kine ki kor sumar bad ka jingpyndonkam ïa ki VR headset na ka bynta ban sumar ïa kiba pang.
Ka jingpule ïa ka VR-Assisted Guided Imagery kan don lang bad ki Virtual Reality headset ba la don lypa ki jingthoh ha ka ktien phareng, Khasi, bad Hindi, ban lah sngewthuh ïa ki jingpang kum ka nausea, insomnia, fatigue, bad jinglynga.
Ha shwa ba kane ka jingsumar kan sdang, kiba pang ki hap ban leh ïa ka relaxation session ban pynaram ïa ka bor pyrkhat kumba 5 sngi.
Na ka liang Dr. Anisha Mawlong, Member-Secretary, State Cancer Society la batai ba ïa kane ka jingwad bniah yn pynlong kumba 10 haduh 12 bnai bad la phiah haduh 3 kyrdan. Ha ka Phase 1 yn pynleit jingmut ïa ki kam jingtei ba kongsan bad ka jinghikai ïa ki medical staff. Ha ka Phase 2, ki nongpang kiba dang hap leh ïa ka chemo-radiation kin sdang ban shim bynta ha ka VR-assisted guided imagery session. Ha ka Phase 3 kan don ka jinglum ïa ki kaiphod ban bishar ïa ka jingmih hadien ba la dep ban sumar.
