Delhi, Naitung 10: Ka sorkar pdeng ka la mynjur ban pyllait pisa T. 1,066.80 klur sha ki jylla Assam, Manipur, Meghalaya, Mizoram, Kerala, Uttarakhand kiba shah ktah ha ka jingshlei um, jingtwa khyndew. Napdeng ki hynriew tylli ki jylla kiba la shah ktah ha ka jingshlei um, ka Assam ka la ïoh T. 375.60 klur, T. 29.20 klur la ai sha ka Manipur, T. 30.40 klur sha ka jylla Meghalaya, T. 22.80 klur sha ka jylla Mizoram, T. 153.20 klur sha ka jylla Kerala, bad T. 455.60 klur sha ka jylla Uttarakhand, kum ka bhah jong ka Central na ka State Disaster Response Fund (SDRF). Kine ki jylla ki la shah ktah namar ka jingjur palat u slap, ki jingshlei um bad ki jingtwa khyndew ha ka por ba jur slap mynta u snem.
Hapoh ka jingialam jong u Myntri Rangbahduh Narendra Modi bad ka jingpyniaid jong u Myntri kam pohiing ka sorkar pdeng u Amit Shah, ka sorkar pdeng ka la shimkhia ban ai baroh ki jingiarap sha ki jylla kiba shah ktah ha ka jingshlei um, ki jingtwa khyndew, ki lyoh. Ka sorkar Modi ka ieng skhem bad ki jylla ha baroh ki jinglong jingman.
Mynta u snem, ka Sorkar pdeng ka la dep pyllait T. 6,166.00 klur na ka SDRF sha 14 tylli ki Jylla bad T. 1,988.91 klur na ka NDRF sha 12 tylli ki Jylla. Nalor kata, la pyllait T. 726.20 klur na ka State Disaster Mitigation Fund (SDMF) sha 05 tylli ki Jylla bad la pyllait ruh T. 17.55 klur na ka National Disaster Mitigation Fund (NDMF) sha 02 tylli ki Jylla.
Ka Sorkar Pdeng ka la ai ruh ïa baroh ki jingïarap ha ka liang ka jingdonkam, kynthup ka jingpynpoi ïa ki kynhun NDRF kiba donkam, ki kynhun shipai bad ka jingkyrshan jong ki shipai suiñ sha baroh ki Jylla kiba shah ktah ha ka jingshlei um, ki jingtwa khyndew, u lyoh. Ha kane ka por slap, 104 tylli ki kynhun jong ka NDRF ki dei kiba la phah sha 21 tylli ki Jylla/UT na ka bynta ki kam pynlait im bad ai jingïarap.
