Shillong, Jymmang, 21: Ka BJP Meghalaya Statae Unit ha ka sngi Balang ka la dawa ïa ka Sorkar Jylla ban pyntreikam pura ïa ka Meghalaya Residents Safety and Security Act (MRSSA) hadien ka jingbthah jong ka Sorkar Pdeng ban khynra naphang ïa ki mynder kiba wan rung beaiñ na ka ri Bangladeshi bad na ka ri Myanmar.
Ha u kyrwoh, u State General Secretary ka BJP Bah Wankitbok Pohshna u la ong, “ka MRSSA, kaba long ka jingïada na ka jingwan buhai shnong be-aiñ, ka dang sah tang ha ka kot sada haduh kine ki sngi. Ka BJP ka dawa ba dei ban pyntreikam pura noh ïa ka MRSSA khnang ba ki nongshong shnong kin ym shah ktah ha ka jingwan tuid beaiñ jong ki briew kiba nabar kiba wan rung shapoh ka jaka jong ngi na kiwei pat ki ri.”
U la ong ba ka State Unit jong ka Party ka pynpw ïa ka jingsngew hun ba ka Sorkar Jylla ka la sdang ban ïakhun pyrshah ïa ki nongshong beaiñ, watla ka BJP Meghalaya ka sngew ba ïa kane ka kam la dei ban leh naduh mynshwa khlem da ap ïa ka jingbthah na ka Sorkar Pdeng.
“Ka Sorkar Jylla ka la pynpaw ba ka Task Force ka la don ha manla ki distrik ka ban shim jingkitkhlieh ban thwet ïa ki nongwan buhai shnong be-aiñ kiba la wan shong shnong ha ka jylla jong ngi. Hynrei kum kane ka Task Force kam shym la lah ban treikam eiei ha kine ki snem haba pyrkhat ïa ka jingjur shaba palat ka jingwan rung ki mynder Bangladeshi bad ki Rohingya ha Meghalaya kumba ki trai shnong kin sakhi ïa kata,” u la ong.
“Ka Meghalaya BJP ka ai jingmut ba ka Sorkar Jylla kan pynkylla ïa ka jingtreikam jong ka Task Force bad ban pynïar ïa ka jingtreikam da kaba kynthup ïa ki khlieh nongsynshar bad ki dorbar jong kawei pa kawei ka shnong kiba lah ban ïarap ban ithuh ïa ki briew ki bym dei na ka thaiñ, ki bor ba dei peit ki lah ban shimti ïa ka jingtohkit nangne shakhmat,” bynrap u Bah Pohshna.
U General Secretary ka BJP u la ong ba ka party ka pynpaw ruh ïa ka jingsngewnguh ïa ka tnad Kam Pohiing jong ka Sorkar Pdeng hapoh ka jingïalam jong u Myntri ka tnat Kam Pohing u Amit Shah kaba la ai por laiphew sngi ïa baroh ki jylla ban wad, ban ithuh, bad ban kyndang ïa ki briew kiba wan rung be-aiñ na ka ri Bangladesh bad na ka ri Myanmar.
Katkum ka jingong jong u, ka jingwan rung tuh bym tehlakam, kaba la ïarap da nongkdew lynti bad ki seng saiñ pyrthei kiba ïoh ïa ka jingmyntoi ha ka vote bank, ka la jia la slem bha bad kane ka la wanrah ïa ka jingkylla ha ka jingroi ka jingbun briew ha kiba bun ki bynta jong ka ri kynthup ïa ka Meghalaya.
U la kdew ba ka jingktah kaba sniew na ka jingwan buhai shnong beain lah ban sngew ha ki jaka bapher bapher jong ka jylla, kynthup ha ka nongbah Shillong kaba la pynmih ïa ka jingsngewkhia kaba jur hapdeng ki nongshong shnong da kaba bynrap ba ki nongwan buhai shnong beaiñ na ka ri Bangladesh bad na ka ri Myanmar ki buh ïa ka jingeh kaba khraw ïa ka jylla bad ki long ruh shi bynta ki nongpynthud ïa ka shongsuk shongsaiñ, da ki kam runar ruser kaba mih na ka jingwan rung beaiñ ki briew na ki ri ba marjan. Kine ki briew ki kit ruh ïa ka jingmut jingpyrkhat ba long pyrshah ïa ka ri India bad kumta ki long kiba pyrshah ïa ka jingshngaiñ jong ka ri jong ngi.
Ha kajuh ka por, u Bah Pohshna u la pyntip ba ka State BJP ka dang pynkhreh ban phah ïa ka kynhun na ka bynta ban ïamir jingmut bad ki ophis jong ka tnad Kam Pohiing ka jylla. Ka jingthmu ka long ban pyntip sha ki heh sorkar shaphang ka jinglong jingman ba shisha ha kaba ïadei bad ka jingwan buhai shnong beaiñ kiba nabar, u la bynrap.
