Shillong, Nailar, 21: Na ki jingker sainar ha khappud kiba la twa bad kiba la julor ki mynder Bangladeshi ki la pyndonkam ban rung tuh sha ki shnong khappud kiba hap hapoh ka jylla Meghalaya.
Ïa kane la pyntip da ki paidbah nongshong shnong ka shnong Khonjoy B, Rongdangai bad Maheshkhola kiba don ha khappud ka South West Khasi Hills district ha ka kynhun jong ki dkhot ba lai ngut ba la thung da ka Sorkar kiba la leit jngoh ïa kine ki shnong ha ka sngi Baar.
Kane ka kynhun jong ki lai ngut ka kynthup ïa u MLA jong ka Mendipathar Constituency u Marthon J. Sangma uba long ruh u Adviser jong ka tnat Bording, u MLA barim ka Mawsynram Constituency u Bah HM Shangpliang uba long u Adviser jong ka tnat Pule Puthi bad u Vice Chairman Bah Kitboklang Nongrem. Ïa ka kynhun jurip la phah da u Myntri Rangbah ka jylla u Conrad K Sangma bad u Symbud Myntri Rangbah ka tnat Kam Pohing u Bah Prestone Tynsong hadien ka jingshah thombor ki nongshong shnong ha ki mynder Bangladeshi.
U Sangma u la pyntip ba ka kynhun ka la ïohlad ban ïakren bad ki paidbah jong ki lai tylli ki shnong kiba la ïathuh lut ïa ki jingwan rung tuh jong ka kynhun Gang ki mynder Bangladeshi kiba la leh ïa ki kam pyntriem.
Ki nongshong shnong ki la pyntip ba ki don lai tylli ki bynta ba la ker sainar kiba la khyllem bad julor, kiba jngai na ka Border Out Post (BOP).
Hynrei ki paidbah ki la pynpaw ïa ka jingshaniah ha ki BSF bad ki Pulit kiba ju ïaid pahara ban khanglad ïa ka jingrung tuh jong ki mynder, ula ong.
U Bah Shangpliang u la pyntip ba kane ka kynhun ki dkhot ba lai ngut kan sa phah ïa ka kaiphod sha u Myntri Rangbah bad sha u Symbud Myntri Rangbah ban ai jingtip halor ki jingshem jong ki ha ka jingleit jngoh ïa ki lai tylli ki shnong khnang ba ka Sorkar kan dup lah ban leh la ka jong ka kamram.
U la ong ba ki paidbah ka shnong Maheskhola ki la pynpaw ïa ka jingsngewkhia ba ka jingker sainar ba la julor ka la pynlong ïa ki mynder Bangladeshi ban ïoh rung tuh sha u pud u sam jong ka jylla Meghalaya.
“Ki (nongshong shnong) la kyntu ïa ka Sorkar ba kan phah maramot noh mardor ïa ki jingker sainar ba la julor ha shilynter ka khappud,” la ong u Bah Shangpliang.
U la pynpaw ruh ba ka jingwanrung tuh jong ki mynder Bangladeshi ka la buh jingma ïa ki paidbah ha ka jingma khamtam ïa ki kynthei bad ki khynnah.
U Bah Shangpliang u la pyntip ba u Superintendent of Police (SP) ka South West Khasi Hills u Bah B. Jyrwa, u la pan bor pahara shuh shuh ban pahara na ka bynta ka jingshngaiñ jong ki paidbah ha khappud.
