Shillong, Naiwieng, 04: Ka Mawlai Town Dorbar (MTD) ha ka sngi Saitjaiñ ka la shimti ban pynbha biang ïa ka jingim jong ki 21 ngut ki khun samla kiba long ki nongshong shnong jong ki shnong kiba don hapoh ka jylli jong ka shnong Mawlai kiba la shah tehmraw ha ka jingim kyrni jong u drok.
Ka jingshimti ïa kine ki khun samla ka la long hadien ba ki la pynpaw ïa ka mon kaba jwat ba ki dang kwah ban im biang ïa ka jingim kaba thymmai bad ban iehnoh dak ïa ki jingmlien ba sniew khamtam u drok uba la pynjot ïa ka jingim ka jong ki.
Kane ka dei ka sienjam kaba nyngkong eh ba ka Mawlai Town Dorbar kum ka shatri jong ki Dorbar Shnong kiba don hapoh ka jylli jong ka shnong Mawlai ka la shim ïa ka jingkitkhlieh ban plie ïa ka jingkhang da kaba khot bad wer ïa ki khun samla shynrang bad kynthei kiba la im kyrni bad kiba la shah teh mraw ha u drok.
Ka Mawlai Town Dorbar ka jingïatreilang bad Manbha Foundation kan sa ai ïa ka jingsumar bad ka jingïasyllok ïa ki khun samla kiba la shah teh mraw ha u drok bad kiba la pyni pat ïa ka mon ba jwat ba ki long kiba kloi ban phaidien noh na une u jingdih buaid.
Ha kane ka wat kaba nyngkong, ki don 21 ngut ki samla kiba la pynrung kyrteng ïalade na ka bynta kane ka jingthmu kaba bha ba la shim da ka Mawlai Town Dorbar.
Ïa kine ki samla yn sa pynsah haduh saw bnai ha ka jaka ba la ai sngewbha da u MDC jong ka Mawlai Constituency u Bah Teiborlang Pathaw kaba don ha Mawkynroh-Umshing, Shillong ha kaba yn sa pynkhuid ïa u drok na ka met jong ki bad yn sumar ruh ïa ki jingpang ba ki don, nalor kaba ai ruh ïa ka jingïasyllok khnang ba kine ki samla kin ïoh biang ïa ka jingim kaba thymmai.
Ha ka jingshimti ïa kine ki 21 ngut ki samla la sakhi lang da ka Dr Rika Lamar na ka Manbha Foundation, u Superintendent of Police (City) Bah Vivek Syiem, u Vice Chancellor jong ka skulbah NEHU, u Prof PS Shukla bad u MDC ka Mawlai Constitunecy u Bah Teiborlang Pathaw, ki Rangbah bad ki nongïalam jong ki shnong ka shnong Mawlai, ki bahaïing hasem jong ki samla kiba la kwah ban ieh syndon ïa u drok ha ka jingim ka jong ki.
