Shillong, Lber, 25: Ka Prof Sherwin May Sungoh ka la shah thung kum ka Pro Vice-Chancellor (PVC) jong ka skulbah North Eastern Hill University (NEHU) Shillong Campus.
Kane ka jingthungkam ka long katkum ka rai ba la pdiang da ka Executive Council (EC) ha ka jingïalang jong ka 85th Emergent Executive Council kaba la long ha 14 tarik, Naiwieng, 2024.
Ka Prof Sungoh ka la shimti kum ka Pro Vice-Chancellor naduh ka 21 tarik, Lber, 2025 bad pyntip ruh ïa kane sha u Vice Chancellor Prof Prabha Shankar Shukla, ong u kyrwoh ba la phah da ka NEHU.
“Ka Prof S.M Sungoh ka dei ka riewshemphang ba pawkhmat bad ka Professor ha ka Department of Education, NEHU, Shillong Campus. Da ka jingshemphang ha kiba bun ki liang, ha ki jingleh ïa ki jingwad bniah bad ki jinghikai ka la phaikhmat sha ka buit hikai, curriculum development, bad educational policy. Ka la noh synniang shikatdei eh ha ka jingkiew irat ka pule ka puthi ha skulbah NEHU ha ki phew snem ba la leit noh bad ka la don bynta ruh ha kiba bun ki research project, ki jingpynmih ïa ki jingthoh bad ka jingshakri ha ki kam ophis. Ka jingshemphang jong ka ha ka pule puthi ka la long ka jingmyntoi ïa ka skulbah,” ong u kyrwoh.
Katkum ka Act and Statute jong ka NEHU, ka Pro Vice-Chancellor kan ïarap ïa u Vice Chancellor ha ki kam ophis, ki kam pule puthi, ha ka liang ka pisa tyngka jong ka skulbah. Katkum ka NEHU Act 13 bad ka Statute 3 (3), u Vice-Chancellor Prof Shukla u la aiti ïa ki jingpynïaid kam, jingpynïaid ïa ka pisa tyngka bad ka jingkitkhlieh ïa ka kam pule puthi sha ka Prof Sungoh ban pynsuk ïa ka jingpyntyllun ïa ki kam jong ka skulbah. Kine ki bor ba la aiti ki lah ban pynkylla katkum ki jingdonkam jong ka skulbah ban pynthikna ïa ka jingtreikam kaba paka.
Ha ka samoi treikam kum ka Pro Vice-Chancellor ka Prof SM Sungoh kan ïoh ïa ki jingsiew bad ki jingmyntoi katkum ba la kdew da ka UGC bad ka Ministry of Education ka Sorkar India kaba long katkum ki polisi treikam jong ka NEHU. Ki jingshakri kin long katkum ki kyndon ba la buh hapoh ka Statute 3 (2) bad Ordinance OE-1 jong ka skulbah.
