Shillong, ïaïong, 23: Ar phew arngut ki khynnah rit na ka jylla Meghalaya kiba pule ha kawei ka skul shimet ba la shu pynïaid beaiñ ha ka jylla Karnataka ki la ïakynduh biang ïa la ki jong ki bahaiïng hasem ha nongbah Shillong ha ka sngi Balang.
Ïa kine ki 22 ngut ki khynnah ba la synran lang da ki ophisar ka District Child Protection Officer, Mandya District, Karnataka, la pdiang sngewbha da u Myntri ka tnat Social Welfare u Bah Paul Lyngdoh ha kaba u la kular ba ka tnat Pule Puthi jong ka Sorkar Jylla kan pynïoh jaka pule ïa ki ha ki skul Sorkar.
Ha ka jingpdiang burom ïa kine ki khynnah ha ka jingïalang ba la long ha Directorate jong ka Social Welfare, u Bah Paul u la ïaroh ïa ka jingtrei shitom jong ki ophisar bad ki nongtrei ka tnat Social Welfare lyngba ka Director ha kaba lai ngut ki la synran lang ïa ki khynnah naduh jylla Karnataka.
“Katba ki dang sah ha Karnataka, la pynbit pynbiang ïa ka jaka sah bad ka bam ka dih na ka bynta jong ki katkum ki kyndon jong ka aiñ. Hadien ba la pynbit pynbiang nadong shadong, ka kynhun na ka jylla Karnataka ba la lamkhmat da ki nongïalam jong ka Child and Women Rights Commission ki la mynjur ban synran lang ïa ki khynnah bad ban pynpoi suk ïa ki la sha Shillong mynta ka sngi,” la ong u Bah Paul.
U Bah Paul u la ïathuh ba ki kmie ki kpa ki ïoh ruh ban ïakren bad ki ophisar kiba mihkhmat ïa ka tnat pule puthi khnang ban pynbiang ïa ki jaka pule na ka bynta ki khun ki kti jong ki.
“Namarba ki la iehnoh ïa ka jingpule shiteng lynti, ka tnat Pule Puthi ka la kular ban pyndep hapoh ar ne lai sngi ïa ki jingdonkam bad ïa kine ki khynnah yn sa phah pule ha ki skul ba la pynïaid da ka Sorkar ha ki shnong ba ki shong ki sah,” la kular u Bah Paul.
“Mynta ki don ki khep ba kine ki kmie ki kpa ki dei kiba kynriah jaka sah, bad kum ha kine ki khep, ngin sa shim ïa ki jaka sah bapura jong ki bad ban pynthikna ba ki khun ki kti kin ïoh pule ha ki skul kiba don hajan bad ynda ki la kynriah ïa ka jaka sah kin hap ban pyntip ïa ngi khnang ba ngin dup lah ban pynbiang ïa ka jingrung skul,” la bynrap u Bah Paul.
Haba kylli, u Bah Paul u la ong ba ka Sorkar kam don eiei ban leh namarba ïa kine ki khynnah la phah mon sngewbha hi da ki kmie ki kpa ban leit pule sha Karnataka.
“Haba ki kmie ki kpa ki la rai ban phah ïa ki khun sha Karnataka, ki leh ïa kata da kaba mynjur bad ka kynhun kaba ïalam, la ka long ha Jowai, West Jaintia Hills District ba dka jingïakren ka long beit tang bad ki nongïalam jong ka kynhun bad ki kmie ki kpa bad kam don eiei ka jingïapynbeit bad ka Sorkar. Kim shym la pan jingïarap eiei na ka Sorkar lane ban pan jingbit, dei tad haduh ynda la jia ka jingjia ba sngewsih, kaba arngut ki khynnah ki la duh ei ïa ka jingim, ki la pyntip sha ka Sorkar,” u la ong.
“Ha kino kino ki khep, ka jingkyrpad jong ngi, ka long la ka dei ïa ki khynnah rit kiba leit pule shabar ka ylla, ki dei ban da wad ïa ka jingtip kaba bniah bad ka jingïarap na ka Sorkar Meghalaya. Ngi la pynthikna ban pynïoh jaka pule ïa baroh ki khynnah kiba naduh ka rta kaba 6 snem haduh 14 snem hapoh ka RTE, Act 2013,” la bynrap shuh shuh u Bah Paul.
