Shillong, Lber, 13: Ki Pulit pynïaid jong kali jong ka Laitumkhrah Traffic Branch ha ka miet sngi Baar mynta ka taïew ki la bat naphang ïa ki nongñiah thuk thuk ar shaka kiba ñiah stet shaba palat ha surok, kiba la dih kiad ha ka por ba ñiah thuk thuk bad ki bym kup ïa ki Helmet ha ka jingtalasi ïa ki thuk thuk ar shaka bad ïa ki kali saw shaka ha Laitumkhrah Police Point.
Kane ka jingpynjur ïa ka jingtalasi ïa ki kali bad ïa ki thuk thuk ka long ban pyrkhing ïa ka jingñiah kali khlemakor da ki riewpaidbah khamtam ha ka por mynmiet myniong khnang ban lait na kino kino ki jingjia ba sngewsih kiba lah ban jia ha ka por bym poi pyrkhat.
Ka kynhun lum khubor jong ka Batesi TV kaba la poi ïaid lynti ka la lap ba ki la don katto katne ngut ki nongñiah thuk thuk ar shaka kiba la shah bat ha ki Pulit Traffic kiba dang pynlong ïa ka jingtalasi kali ha kane ka miet.
