Shillong, Jymmang, 24: U MLA ka North Shillong Constituency Bah Adelbert Nongrum u don hapdeng ka jingshitom kaba jur la pynkit noh ha ka step sngi Saitjaiñ da ka liengsuiñ sha Chennai ha kaba u Myntri Rangbah ka jylla u Conrad K. Sangma u la shimkhia ban pynbiang ïa ka liengsuiñ ba kyrpang khnang ba u Bah Adelbert un ïoh kham kloi ïa ka jingsumar.
Ryngkat ka jingsynran lang jong ka kurim bad u khun shynrnag, la kit ïa u Bah Nongrum da ka liengsuiñ kad liengsuiñ na Umroi sha Chennai ha kaba yn sumar ïa u ha CMC Vellore.
Katkum ka jingtip ba la ïohlum la ïathuh ha u Bah Adelbert u don hapdeng ka jingshitom na ka daw ka jingdon u maw ha u ksang.
Dang shen, u Bah Adelbert u la shah puid ha Dr. H. Gordon Roberts Hospital, Jaïaw Shillong bad hadien ba u la khlain bad ïoh kham bor u la leit phai noh sha iing hynrei tang hadien katto katne kynta ka jingpang ka la khie biang namarba ka jingbakla ha ka bam, kumta la pynkit biang ïa u sha hospital. U la shitom mynta kumba shibnai duna bad dei ha ka sngi Saitjaiñ ka jingshitom ka la kham jur kumta la hap pynkit noh ïa u da ka liengsuin na Umroi sha Chennai.
Hapdeng ka jingthiah pang ki la don bun ngut ki nongmihkhmat kiba la leit jngoh bad ai mynsiem ïa u naduh u Myntri Rangbah ka jylla u Conrad K. Sangma, u nongïalam ka Liang pyrshah u Dr.Mukul Sangma, ka Myntri Sorkar ka Dr. Ampareen Lyngdoh bad kiwei pat kiba la leit ban kitbok ïa u.
