Shillong, Rymphang, 17: Ka Rambrai Jyrngam Constituency ka dei ka Constituency kaba ïakhleh jaitbybriew ha kaba ki don ruh ki paid Garo kiba sah ha ki thaiñ khappud kiba ïoh ban ïashim bynta ha ka election sha ka Khasi Hills Autonomous District Council bad kiba bun ki kyrtong kiba ju ïakhun ïa ki election ki ju ap khmih lynti ruh ba kin ïoh jingkyrshan borbah na ki paid Garo kiba shong basah hapoh kane ka Constituency.
Uwei na ki kyrtong uba ïakhun ïa ka election MDC na Rambrai Jyrngam Constituency kum u kyrtong shimet kata u Bah Lurshai Kharbani uba don ha syndah jong u MLA ka Rambrai u R.G Momin u dei uwei napdeng ki kyrtong uba la ïoh ia ka jingkyrshan borbah na ki paid Garo kiba buhai shnong sha ki thaiñ khappud.
Kane ka la paw ha ka Lah Sngi u Blei ha ka jingïalang kaba la long ha ka shnong Malang Sildubi ha kaba ki paid Garo puk ki la tuid sha kane ka jingïalang ban ai jingkyrshan ïa u Bah Lurshai da ka jingsynran lang jong MLA u R.G Momin.
