Shillong, Nohprah, 09: Ka National Highway Demand Committee (NHDC) South West Khasi Hills District ha ka zngi Baar ka la dawa ïa ka Sorkar Jylla ban shna beit ïa ka surok Double Lane kaba pynïasoh naduh ka shnong Mawngap, East Khasi Hills District ter ter shaduh ka shnong Ranikor, South West Khasi Hills District kaba ju tip mynshwa kum ka Surok National Highway 44-E.
Kane ka jingdawa jong ka Committee ka long hadien ba la ïoh jingtip ba ka Sorkar ka la thmu ban pynkylla noh tang kum ka Immediate Road.
Halor kane, ka Committee ka la aiti ïa ka dorkhas jingdawa ha u Symbud Myntri Rangbah ka Jylla u Bah Prestone Tynsong uba khmih ïa ka tnat PWD Roads.
Ha ka jingïakren bad ki lad pathai khubor u Chairman jong ka Committee u Bah Kynpham V. Kharlyngdoh u la ong ba kum ka kynhun ka la kyntu ïa ka Sorkar ba kan ïatreilang bad ka National Highways and Infrastructure Development Corporation Limited (NHIDCL) bad ka Sorkar Pdeng khnang ban pynurlong ïa kane ka projek hadien ba ka Sorkar ka la thmu ban shna tang kum ka Intermediate Road.
