Shillong, Rymphang, 27: Ki dkhot jong ka Federation of Khasi Jaiñtia & Garo People, Ri Muliang Circle hapoh ka jingïalam jong u President u Bah Serbilin Lyngdoh, ha ka sngi Palei ki la leit ban ïakynduh ïa u Deputy Commissioner jong ka West Khasi Hills District u Bah Garod LSN Dykes ban pan jingpynshai halor ka jingïai bteng ka Sorkar Assam ban theh ïa ki song pynroi sha ka Langpih wat haba ka Sorkar Meghalaya bad ka Sorkar Assam ki dang don hapdeng ka jingïakren ïa pynbeit pud.
Na ka liang jong ka Seng ka la pynsngew hakhmat u Deputy Commissioner ba ka Sorkar Assam ka la shna pynheh ïa ka surok na Komphaduli kaba poi sha Langpih bad ha kajuh ka por ka seng ka la pan jingpynshai ruh na u Deputy Commissioner halor ka jingpynheh surok da ka Sorkar Assam la ka dei kaba la ïatip lang neem bad ki bor ka Sorkar Meghalaya.
U Bah Serbilin Lyngdoh u la ong ba kane ka jingïai theh ka Sorkar Assam ïa ki kam pynroi ha ka thaiñ Langpih ka lah ban ktah wat ïa ka mat jingïapynbeit pud hapdeng ka Meghalaya bad ka Assam namar ki don bun tylli ki shnong Khasi bad Garo ki bym kwah ban shah pynngat sha ka jylla Assam hynrei ki don sha shiliang jong ka surok ba la pyntrei da ka Sorkar Assam.
