Shillong, K’lyngkot, 20: Ka la mih ka jingïashoh ïadat bad ka jingïapyni bor ha ka sngi Baar hadien ba ki riewshim kabu kiba dei ki nongshong shnong jong ka shnong Bakrapara, Assam ki la pyrshah ïa ki paidbah ka shnong Maikhuli, kaba hap hapoh ka Pilangkata Police Outpost ha Ri Bhoi District, kiba la ïarap ïa ki nongtrei ka Meghalaya Energy Corporation Limited ban thung ïa ki 5 tylli ki nar post electric ha ka shnong Maikhuli.
Kum ban shu pynkynmaw hangne, dang shen ka la mih ka jingipynibor ha ka shnong Maikhuli, ka shnong kaba don ha khappud ka Meghalaya bad Assam halor ka jingthung ïa ki nar post electric da ka Sorkar Assam hynrei ïa kane huri hura la lah ban tem da ki bor synshar ka Ri Bhoi district bad ka Kamrup District ha kaba la thaw ruh da ka Border Peace Committee ban ym pynthud ïa ki kam pynroi.
Ha ka jingïapynibor, u Rangbah Shnong ka Maikhuli u la shah ktah kti bad shah shoh ha ki riewshim kabu na Assam.
Katkum ka jingtip ba la ïohlum la ïathuh ba ka jingïashoh ïadat ka kut noh tang shiphang hadien ba la wan poi ki Pulit na Meghalaya bad na Assam bad hadien kane, ki paidbah ka shnong Maikhuli ki la lah ban thung pyndep ïa ki 5 tylli ki post electric wat hapdeng ka jingpyrshah kaba jur na ki paidbah ka jylla Assam.
