Shillong, Ïaïong 25: Ka seng HYC Jatap bad Shella Area Unit bad ki shipai BSF Border Out Post (BOP) Beltoli ki la shong ka jingïalang na ka bynta ka jingdonkam ban pynkhlaiñ ïa ki lad jingïada ha khappud ka India bad Bangladesh.
Ïa kane ka jingïalang la pynlong ha ka sngi Thohdieng hapdeng ki BSF bad ki dkhot ka Hynñiewtrep Youth Council (HYC) – Jatap and Shella Area Unit.
Ïa kane ka jingïalang la pynïaid da u Kamal Khulbe, Deputy Inspector General, PRO Frontier Hqs BSF Meghalaya, bad la shim bynta da u Bah Pyndapbor Shongwan, President, HYC – Jatap Unit, u Bah Batynshain Natep, Vice President, HYC – Shella Area Unit, ha ryngkat ki nongmihkhmat ki nongïalam shnong na ki thaiñ khappud.
Ha ka jingïalang la ïakren sani bad bniah bha halor ki kam runar kiba ju jia ha ka khappud, ka jingmih jingrung beaiñ ha shi lynter ka khappud ka India Bangladesh, ha kaba kane ka la ktah ïa ka jingshong shngaiñ jong ka ri bad kumjuh ruh ki nongshong shnong ka thaiñ.
Na ka liang ki BSF ki la ïai pynskhem ïa ka jingangnud jong ki ban ïai long kiba peitngor bad ki la pynthikna ruh ba kin ai ka jingïatreilang kaba pura bad ki nongïalam shnong bad ki seng ka imlang sahlang ban tehlakam ïa ki kam runar ha ki thaiñ khappud.
Halor kane na ka liang ki nongmihkhmat jong ka HYC ki la mynjur ban pynkhlaiñ ka jingïatreilang, ban ïa sam ïa ki jingtip lada don kano kano ka kam runar ne kiwei pat bad ban kyrshan iwei ïa iwei pat ban tehlakam ïa ki kam beaiñ bad ka jingwan rung tuh hapoh u pud u sam ka ri India bad khamtam kaba don ha Meghalaya.
Ka jingïalang ka la kut da ka mynsiem kaba khlaiñ ban don ka jingiïtreilang bad ka jingmut kaba don ka jingkitkhlieh ban pynthikna ki lad jingïada, ka suk ka saiñ, bad ka jingshong shngaiñ ha ka thaiñ khappud, bad na ka liang u PRO ki BSF u la pynpaw ba kum kine ki jingïalang dei ban pynlong manla ka por ban pynkhlaiñ ka jingïatreilang halor kane ka kam kaba donkam bha.
