Shillong, Jymmang , 04: Ka Synjuk ki Seng Rangbah Katholik Shillong Archdiocese ka la pynkut noh ïa ka dorbar kaba ar sngi kaba la long Parish Divine Mercy Church Mawryngkneng ha ka 3 tarik bad 4 tarik mynta u bnai.
Ka phang pdeng jong ka dorbar ka long “Ki Pilgrim jong ka Jingkyrmen”
Da ki phew hajar ngut ki Rangbah kiba la tuid ha kane ka lympung kaba shisien shisnem ha kaba u Bishop jong ka Nongstoin Diocese u Most Rev. Wilbert Marweiñ u la long kum u kongsan uba la pynmynta ïa ka Mass Bakhuid ha jingsynran lang u Spiritual Director u Rev. Fr. Andreas Pariat, u Rev. Fr. Prior Khongsit uba long u Parish Priest jong ka Mawryngkneng Parish bad ki Lyngdoh Sohblei.
U Bishop Wilbert ha pharia ïa ka ktien U Blei na ka Jingthoh Bakhuid u la ong, “lyngba ka Diengphna u Khrist u la jop ïa ka pop bad ïa ka bor jong ka jingdum. Kumba ka jingpule kaba nyngkong kaba batai ba ki Apostol kim shym la tieng namarba u Khrist u la mihpat bad u la jop ïa ka pyrthei jingdum.”
U bynrap ka mat jong ki longkpa kiba wan dorbar ka dei ban leit ïalap khlem jingtieng da kam bad ki nuksa jingsngewrit ha ka rukom jingduwai.
Ha ka nohphai sngi u Rev. John Madur uba la kren bniah bha ïa ka phang “ki Rangbah longkpa bad ka Jingngeit bad ka jingduwai.”
Hadien ka Mass bakhuid ka Synjuk ki Seng Rangbah Katholik Shillong Archdiocese ha ka jingïalam u President Bah Carlus Kharkongor ka la pynkup burom ïa u Bishop Wilbert Marweiñ bad ïa ki kmie ki kpa kiba la ai ïa la ki khun ban long Lyngdoh riewniam ïa kaba la la sam da u Bishop Wilbert Marweiñ.
ka Synjuk ka la pynkup burom ïa u Bah Seibor Warbah uba la jop ïa ka elekshon MDC na Mawkynrew Constitueny bad uba dei u Secretary jong ka Synjuk Seng Rangbah Katholik Shillong Archdiocese Zone-V ha kaba la sakhi lang da u MLA ka Mawryngkneng Constituency u Bah Heaving Stone Kharpran bad kiwei kiwei kiba la shah khot sngewbha.
La pynbna pat ba ïa ka dorbar kaba khat hynñiew kan sa long ha Nongpoh Parish ha u snem 2026.
