Shillong, Risaw, 13: Ka Synjuk ki Seng Rangbah Katholik Zone II ka la pynlong ïa ka lympungbah kaba phra ar sngi kynthih ïa kaba la pynlong ha Iingmane jong u Petrus bad Paulus Bakhuid, Parish Pynthorumkhrah.
Kane ka lympung jong ka Zone II ka kynthup ïa ki Khyndai tylli ki Parish kata, ka Pynthorumkhrah, Mawpat, Nongmensong, Mawpdang, Umpling, Nongthymmai, Laitumkhrah, Madanryting bad Nongrah.
Kum u rangbah uba don ka jingleit khlieh ïa ka iing ka sem bad ka Balang ka dei ka mat kaba la ïathir ïa ka juk nongïalam ba mynta bad ka jingjyllei ki khun samla kiba la ngop bad im kyrni ha u drok.
Ka Synjuk bad ka Seng Rangbah jong ka Parish Pynthorumkhrah ki la pynlong ka jingïalang kaba jop hapoh ka jingïalam u Lyngdoh Nongsharai Rangbah u Sohblei Laurence Nongkseh bad u Sohblei Pascal Lyngdoh uba long u Spiritual Director jong ka Zone ki la long ki nongai jingmut ha kane ka Dorbar.
Ïa kane ka dorbar jong ki rangbah la plie pyrda da u Vicar General jong ka Jylla Niam Bah Shillong u Sohblei Richard M. Majaw ha ka sngi Saitjaiñ da kaba kyntiew ïa ka lama jong ka Zone bad ka jingpyllait paidbah ïa ka jingrwai kaba ai kyrteng ” Rah sha U Trai la ki kti Ban ïaroh da ki jingduwai ” ba la rwai da ki rangbah jong ka Parish Pynthorumkhrah.
Ha ka Sngi u Blei u Archbishop Victor Lyngdoh u la long u kongsan ban pynmynta ïa ka Mass Bakhuid bad ki Lyngdoh Sohblei jong ki 9 tylli ki shnat niam.
U Archbishop Victor u la ai ka sneng ka kraw sha ki rangbah ba ki dei ban pule bad ban tip ruh ïa ki lai tylli ki jingmut jong u “Alphabet WWW” kaba mut “Wisdom, Worship bad Work.”
Lada ki rangbah ki tip ïa ki lai tylli ki “W” ka mut ki la dei ki rangbah kiba kit ïa ka imlang ka sahlang bad ka iing ka sem.
Hadien ka Mass Bakhuid u Archbishop Victor u la pyllait paidbah ïa ka kot kaba la thoh da u Sohblei Barnes Mawrie, SDB uba long u Phadar Synrop jong ka Parish Mawpdang.
La pynkut ïa ka Dorbar da ka jingpynhiar ïa ka lama da u Sohblei Ruben Lyngdoh bad ka jingaiti ïa ka lama jong ka Zone sha ka Parish Mawpat na ka bynta ban pynlong ïa ka Dorbar kaba khyndai ha u snem 2025.
