Shillong, ïaïong, 17: Ka St. Edmund’s School, Shillong ha ka sngi Balang ka la pynlong ïa ka Annual School Sports da ka jingïashim bynta lang jong ki skul bapher bapher kiba don ha ka jylli jong ka shnong Laitumkhrah, Shillong.
La sdang ïa kane ka lympung ïalehkai kaba ju pynlong shisien shi snem da ka jinglehkai drill ba la ïashim bynta da ki khynnah pule jong ka St Edmund’s School ha kaba la sakhi lang da u President jong ka St Edmund’s Past Pupils Association u Ramesh Bawri uba la long kum u Kongsan, u Principal jong ka skul u Brother Solomon Morris, ki nongshah khot sngewbha bad ki kmie ki kpa jong ki khynnah skul.
Hadien kane, la pynbud pat sa ka Inter House march past ba la ïashim bynta da ka kynhun McGee, O’Brien, McCann bad Roe bad la pynlong ruh ïa ka jingïakob mareh da ki khynnah pule ka Jyoti Sroat School, ka School Centre for Hearing Handicapped bad ka Marry Rice Centre, St.Edmund’s School.
Katba ha ka Inter School Relay Race na ka bynta ka 4 x 100 metre ha ka Under-16 jong ka liang ki kynthei ka Loreto Convent ka la ïohrah ïa ka kyrdan banyngkong, ka Kiddies Corner ka la ïohrah ïa ka kyrdan kaba ar bad ka St. Mary’s Higher Secondary School, ka la ïoh rah ïa ka kyrdan kaba lai.
Ha ka Under-16 jong ki shynrang ka St.Edmund’s ka la ïoh rah ïa ka kyrdan kaba nyngkong, ka St.Anthony’s ka la ïoh rah ïa ka kyrdan kaba ar bad ka Meghalaya Police Public School ka la ïohrah ïa ka kyrdan kaba lai.
Ha ka kyrdan Under-18 jong ki shynrang, ka St. Anthony’s ka la ïohrah ïa ka kyrdan banyngkong, ka St. Edmund’s ka la ïohrah ïa ka kyrdan kaba ar bad ka St. Edmund’s ka la jop ïa ka kyrdan kaba lai.
Ha ka 100 metre race ha ka Under-16 ha ka liang jong ki kynthei, ka Loreto Convent ka la jop ïa ka kyrdan banyngkong, ka St. Mary’s ka la jop ïa ka kyrdan kaba ar bad ka Kiddies Corner ka la jop ïa ka kyrdan kaba lai.
Ha ka Under-18 ha ka liang ki kynthei, ka St. Mary’s ka la jop ïa ka kyrdan banyngkong, ka Loreto Convent ka la jop ïa ka kyrdan kaba ar bad ka St. Anthony’s ka la jop ïa ka kyrdan kaba lai.
Ha ka Under-16 ha ka liang jong ki shynrang ka St. Edmund’s ka la jop ïa ka kyrdan banyngkong, ka St.Anthony’s ka la jop ïa ka kyrdan kaba ar bad ka Meghalaya Police Public School ka la jop ïa ka kyrdan kaba lai.
Ha ka Under-18 ha ka liang jong ki shynrang ka St. Edmund’s ka la jop ïa ka kyrdan banyngkong, ka St.Edmund’s ka la jop ïa ka kyrdan kaba ar bad ka St.Anthony’s ka la jop ïa ka kyrdan kaba lai.
