Shillong, Nailur 07: U Chief Justice jong ka Iingbishar Meghalaya High Court u Indra Prasanna Mukerji u la shongthait ha ka 5 tarik mynta u bnai hadien ba u la kynjoh ïa ka rta shongthait.
Ha ka jingleh burom ba la pynlong ha Meghalaya High Court la sakhi lang da u Advocate General, Additional Advocate General, ki nongïasaid aiñ, ki heh sorkar, bad kiwei kiwei.
Ki nongkren bapher bapher ki la ñiew tang ïa ka jingnoh synñiang jong u Justice IP Mukerj ha ka jinglong nongbishar ha ka jylla Meghalaya.
“Ha ka por kum u nongbishar rangbah ka Meghalaya High Court, ula pynïaid bad pynmih ïa ki hukum ha ki katto katne ki mukotduma kiba pawnam kum ka mukotduma jong ki nongdie jingdie ha surok, ka jaka thang metïap briew na ka bynta ki jaitbynriew Hindu Khasi & Jaiñtia, ka jingktah na ka jingma kaba ap na ki ksew surok, ka jingshah pynjot ïa ka mariang haba pyntrei ïa ka surok Shillong-Dawki, ka Central Bonded Warehouse bad kiwei kiwei.
“Une u nongbishar ula shim ruh ïa ka bynta kaba khraw ha kaba pynroi ïa ki jingtei jong ka ïingbishar ha ka jylla,” ong u Registrar General jong ka High Court ha ka kyrwoh ba la pynmih ha ka sngi U Blei.
Da ka jingshongthait noh u Justice Mukerji, ka Ministry of Law and Justice, Department of Justice (Appointments Division), ka Sorkar India, ka la thung ïa u Justice Hamarsan Sing Thangkhiew ban bteng ïa ki kam jong ka ophis jong u Chief Justice High Court naduh ka 6 tarik mynta u bnai.
